Autoridadnan Colombiano ta investigando un posibel plan, envolviendo Venezolanonan, pa asesina presidente Ivan Duque, segun un halto oficial a bisa diasabra anochi.
Minister di exterior, Carlos Holmes, a bisa cu e servicionan di inteligencia Colombiano ta bin scuchando rumornan tocante supuesto plannan pa asesina e conservador Duque. El a bisa cu e aresto, den dianan recien, di tres Venezolano den posesion di armanan a intensifica e preocupacion di e autoridadnan. “Cu inmenso preocupacion y e maximo condena, mi kier informa e comunidad internacional cu, en efecto, durante e ultimo lunanan, investigacionnan di inteligencia ta tumando luga tocante posibel atentadonan contra e bida di e presidente”, Holmes a bisa den un video riba Twitter.
Blue Radio a reporta cu e Venezolanonan aresta na e ciudadnan Caribense di Valledupar y Barranquilla e luna aki, tabatin den nan poder un rifle telescopico, como tambe un mini-Uzi di 9mm, municionnan, y un granada di aturdimento. Sin identifica nan fuente, Blu a bisa cu cualkier intento lo mester a conta cu e apoyo di rebeldenan iskierdista Colombiano, of organisacionnan di trafico di droga, y lo a tuma luga pa coincidi cu e cuminsamento di e di dos termino di presidente Nicolas Maduro proximo luna.
E video di Holmes no a cita ningun evidencia, y no a bisa si autoridadnan a verifica e existencia di algun conspiracion. No tabatin reaccion inmediato di gobierno Venezolano.
Holmes a pidi Colombianonan pa comparti cualkier informacion cu nan tin cu lo por afecta e siguridad di e presidente. Ademas, el a gradici e cooperacion di agencianan stranhero di inteligencia, cual e no a identeifica, pa yuda proteha Duque.
