(AFP) – Gustavo Petro presidente di Colombia diaranson ultimo a pidi pordon na e victimanan di dos masacre cu a wordo cometi pa paramilitar na final di e decada di 1990, esey debi na un orden emiti pa Corte Interamericano di Derechonan Humano na 2006.
“Awe como representante di Estado Colombiano mi mester pidi pordon na tur e victima familiar y victimanan cu no por compaña nos pasobra nan a wordo asesina pa e mesun Estado, un Estado asesino”, Petro a expresa den un acto publico na ciudad di Medellin.
Na un distancia di 100 kilometer di eynan, na municipio di Ituango, paramilitar di derecha extremo a masacra miles di civil indefenso na e poblacion di El Aro y La Granja na 1997 y 1996.
Na comienso di su intervencion e mandatario a lesa e nomber di 19 persona cu a muri den e hechonan, pa loke Corte Interamericano di Derechonan Humano a responsabilisa Estado na 2006.
Ambos matansa a sucede den transcurso di varios dia cu “conocemento y colaboracion di parti di miembronan di Forsa Publico”, segun Corte.
Den e caso di El Aro, paramilitar a acusa e habitantenan di colabora cu guerrilleronan di iskierda y a tortura varios persona den publico. Tambe nan a kima e mayoria di casnan y a obliga varios sobreviviente pa transporta ganado horta na e comunidad durante 17 dia, segun Corte a relata den e sentencia.
Tribunal a ordena indemnisa cada un di e familiar di e fayecidonan cu 10.000 dollar y realisa un acto di reconocemento publico, entre otro reparacion.
Estado Colombiano a haci “un reconocemento parcial di responsabilidad” por escrito na Corte y a indemnisa e victimanan varios aña pasa, pero no a haci e evento publico.
“Tabata un exterminio planifica pensa riba terminonan di elimina enemigonan. Pasobra nan tabata wak e campesino como un enemigo”, e presidente durante su discurso a recorda.
