(AP) — Colombia a mira un reduccion di 33 porciento den deforestacion den prome kwartaal di 2025, compara cu e mesun periodo aña pasa, segun ministerio di Medio Ambiente a bisa ayera, citando coordinacion comunitario mas fuerte y accion contra crimen ambiental.
Papiando na un conferencia di prensa, minister di Medio Ambiente, Lena Estrada Añokazi a bisa cu deforestacion a baha di 40.219 hectar na comienso di 2024 pa 27mil hectar e aña aki. Gobierno a identifica 18 hot spot di deforestacion activo, incluyendo 13 den Amazon y otronan den regionnan manera Catatumbo, Arauca y nort Pacifico.
“Den parkenan nacional di Amazonia, deforestacion a baha cu 54 porciento… cual ta un hopi bon resultado,” Estrada a bisa, resaltando logronan den parkenan Amazonico di Tinigua, Chiribiquete y La Macarena.
Amazonia ta keda e region mas afecta di Colombia, contando pa 69 porciento di deforestacion na e pais.
E departamentonan – e divisionnan administrativo principal di Colombia – di Meta, Caqueta, y Guaviare a mira e reduccionnan mas grandi, mientras Putumayo tabatin un aumento leve.
Estrada a atribui e reduccion na e plan integral di gobierno pa combati deforestacion, cu ta inclui acuerdonan comunitario, refuerso institucional, y operacionnan conhunto cu ministerio di Defensa y oficina di Procurador General.
Un rapport recien di inspector general di Colombia a nota cu mientras deforestacion a reduci en general, presion riba areanan protegi ta keda intenso, cu cultivo ilegal di coca y mineria no regula avansando den parkenan nacional. E vigilante independiente a bisa cu entre october 2024 y maart 2025, casi 88.900 hectar di selva a ser perdi na nivel nacional, di cual hopi tabata den areanan designa pa conservacion ambiental.
E minister a bisa cu e esfuersonan a conduci na aresto clave, incluyendo di individuonan cu laso den sector ambiental.
Bayendo dilanti, Estrada a delinea un plan di accion teritorial pa inclui autoridadnan local y indigena.
Un serie di reunion regional ta programa pa cuminsa na juni, cuminsando na Villavicencio cu lidernan di Amazonia y Orinoquia.
Deforestacion na Colombia ta impulsa principalmente pa acaparamento di tereno, construccion ilegal di caminda, criadero ilegal di baca, mineria ilicito y cultivo di coca, e materia prima pa produci cocaina.
