Ex-presidente Colombiano Álvaro Uribe Vélez a sali positivo pa Covid-19 oranan despues cu Corte Supremo di Husticia a ordena su detencion domiciliario, pa presunto fraude procesal y manipulacion di testigonan.

Di acuerdo cu un miembro di ekipo di trabou di Uribe, e ex-mandatario no a presenta sintomanan pa cu e virus. E homber cu a goberna Colombia entre 2002 y 2010, a keda deteni na su domicilio pa acusacionnan di aña 2012, ora e ex-mandatario a demanda e senador di iskierda Ivan Cepeda pa supuesto manipulacion di testigonan. E legislado tabata prepara den momento ey un caso contra Uribe pa su presunto vinculonan cu grupo paramilitar.

Sinembargo, e demanda cu Uribe a haci contra Cepeda a bira contra dje, despues cu e magistrado Jose Luis Barcelo, di Corte Supremo, no a pone den lachi e caso so contra e legislado, sino cu a habri un file nobo contra e ex-gobernante, ora a acusele di ta supuestamente involucra den soborno di testigonan, pa faborece su mes den e acusacionnan di Cepeda. Un caso pa cu e Fiscalia a acusa cargo contra Diego Cadena, ex-abogado di Uribe, ken ta declara su mes inocente y a afirma cu no a haci pagonan di placa como soborno.

Te awor, Uribe lo mester permanece bao aresto domiciliario, mientras ta defini so lo bay of no na un huicio y lo mantene aleha di su labor como congresista. Den caso cu lo haya responsabel, lo enfrenta un castigo di “alrededor di 2 pa 4 aña” di prizon, segun e abogado Hernando Herrera, director di Corporacion Excelencia den Husticia a splica.

 

 

LEAVE A REPLY

Please enter your comment!
Please enter your name here