Diadomingo ultimo, 14 bombero di Post Oscar na Aeropuerto Internacional Reina Beatrix a biaha pa Jacksonville Florida pa un curso di Aircraft Rescue Fire Fighting. Tanto Minister di Husticia mr. drs. Arthur Dowers, como comandante di Brandweer Aruba, Johannes de Haas, tabata presente pa desea e bomberonan aki tur clase di exito cu e siman intensivo di training.
Comandante de Haas, a indica cu e facilidad di training na Jacksonville, ta ofrece training specialisa na nos bomberonan pa mantene nan optimalmente prepara den nan tarea di combati candela. E training aki ta specialmente pa mantene e bomberonan ubica na Post Oscar na Aeropuerto skerpi y riba nivel internacional pa por atende cu cualkier calamidad di aviacion.
Segun comandante de Haas, e cumplimento cu e training aki ta crucial pa por cumpli cu e audit cu ta haci cada 3 aña riba e preparacion di e bomberonan na aeropuerto. Esnan cu no completa e training aki cu exito, no ta permiti traha warda na Post Oscar y si no tin suficiente personal riba standby na aerouperto, Post Oscar no por funciona. Pesey ta importante pa tin suficiente bombero certifica cu e training aki. Recientemente 14 bombero a sigui e training aki, awo ta 14 mas y den futuro cercano ainda tres grupo di 14 bombero lo biaha pa Jacksonville y otro aña lo cuminsa atrobe cu e training aki.
E curso ta encera paga candela di motor di avion, candela durante aterisahe, pero tambe con pa rescata pasaheronan for di avion despues di un accidente. E curso ta repasa tur aspecto di rescate den caso di un accidente cu avion, di candela, y tur posibel scenario cu ta inclui avionnan accidenta. Ademas, e cumplimento di e trainingnan aki ta parti di e checklist di ICAO su certificacion.
