Diabierna ultimo a tuma luga den Caya G.F. Betico Croes, Caya Grandi, e evento “Ban Bek Caya”. Un iniciativa di parti di Gabinete AVP-FUTURO pa revitalisa e centro di ciudad. E evento aki ser ricibi pa tanto comerciante como tambe pueblo di Aruba cu a disfruta di un ambiente unico den caya grandi.

Bon Dia Aruba tabatin e oportunidad di combersa cu varios comerciante den caya grandi tocante e actividad y nan sentimento di mira un caya grandi yen di bida y hende despues di tanto aña.

Un comerciante, ken ta un di e comerciantenan mas antiguo den caya grandi a expresa su felicidad pa mira tanto hende den caya grandi. E tin hopi aña na Aruba bayendo di generacion pa generacion y dentro di dos aña ta cumpli 100 aña di existencia. Durante hopi aña nan tabata testigo con caya grandi poco poco a cuminsa perde su bida y comerciantenan cu ta cera nan negoshi pa motibo di esaki.

“Nos ta haya hopi e actividad cu e gobierno nobo a trece pa e caya haya bida atrobe. Nos ta sumamente contento di e actividad di awe. Nan a bisa cu e actividad ta bay sigui y nos ta spera ta berdad pasobra di berdad e caya tabata hopi morto. P’esey nos ta hopi contento cu tur ambiente cu tin y nos a haya hopi hende,” e comerciante a bisa.

E doño di e negoshi aki a probecha e oportunidad pa tambe haci un actividad special pa su clientenan cu a keda fiel na e negoshi durante e ultimo añanan y a organisa un bingo special den e tienda pa gradici e clientenan pa nan sosten.

Otro comerciante cu tambe tin su tienda den caya grandi pa hopi tempo, desde tempo cu caya grandi tabatin bida. E comerciante a splica cu pa basta aña, specialmente despues di COVID tabatin un caida drastico. Despues a tuma tempo pa por a termina cu e proyecto di tram tambe tabata un temporada hopi fuerte. Despues cu e tram a keda cla y a cuminsa core, a mira un tiki mehoracion, pero nada significante.

Pero e reaccion cu e evento di Ban Bek Caya a ricibi tabata un alegria pa e comerciante. “E reaccion di awe ta increibel. Nos ta realmente contento cu e gobierno a tuma e iniciativa aki pa bin back den caya grandi y esaki awe, loke nos a mira tabata realmente electrisante y ta asina dushi pa mira asina tanto hende riba caya principal y den e localnan,” el a enfatisa. .

E comerciante aki tambe a expresa su deseo pa e evento aki continua den fin di siman of un biaha pa luna pa asina caya grandi y e comerciantenan cu tin nan negoshi den caya, specialmente esunnan cu ta lucha cu nan negoshi pa hopi aña, por sinti bibo atrobe y incentiva e pueblo pa cuminsa bin back den caya grandi y cumpra den e negoshinan aki, cual el a subraya, ta importante tambe pa nan como comerciante.

“Ohala e sigui pa e aña tambe, bo sa den fin di siman, riba un base mensual, pues ohala. E tabata un exito bastante grandi. Por lo menos nos ta sinti nos bibo. Nos como e doñonan di tienda aki nos lo gusta esaki sigur pa ta por lo menos mensualmente pasobra asina nos ta sinti cu por lo menos bo sa hende lo drenta,” el a indica.

Otro comerciante cu Bon Dia Aruba a combersa cune a splica cu e iniciativa di gobierno nobo ta di aplaudi, sobretodo mirando den e poco tempo cu nan tin den gobierno, con nan a traha pa trece enfoke den caya, cu pa hopi aña tabata bandona.

“Mi ta aplaudi e gobierno nobo pa hinca esaki den otro. Hopi ta papia cu nan kier traha pa desaroya caya grandi atrobe, pero masha poco tabata ser haci. Mi ta spera cu e evento aki por continua, y cu no ta solamente cos di un solo biaha. Mi ta spera gobierno keda traha pa caya grandi haya bida atrobe,” el a remarca.

Igual cu e demas comerciantenan, e doño di negoshi aki tabata hopi contento di mira asina tanto hende den caya grandi. Di otro banda el a menciona cu talbes berdad hopi hende no a cumpra hopi cos, pero ta e prome evento. “No hopi a cumpra akiden, hendenan a drenta y pasa wak, pero esey tambe ta algo positivo. E ta e prome stap den e bon direccion y di berdad nos ta spera esaki continua,” el a agrega.