Den un carta cu ODA (Oranjestad Downtown Association) a manda pa gobierno riba 9 di November 2016, ta para cu e anuncio pa ‘flexibilisa’ e maneho di parkeermeter ta mucho poco y tambe mucho laat. Bon Dia Aruba a logra haya copia di e carta aki cu aworaki ta circulando Online, y como a wordo publica via NoticiaCla.com, e carta ta un apelacion na gobierno pa actua de inmediato pa evita un cierre total di Caya Betico Croes anto cuminsa introduci solucionnan cu cuater paso urgente.
4 Punto:
– Elimina Parkeermeter completamente
– Elimina tram y habri Caya Betico Croes pa trafico
– Introduccion di un moratorium riba negoshi pafo di Caya Betico Croes
– Introduci incentivo fiscal pa atrae mas negoshi bek pa Caya Betico Croes
E carta a wordo firma pa cuater comerciante di tiendanan Mango, Maggy’s, Benetton & La Linda. E carta ta indica cu no tin luho mas di tempo anto cu mester actua inmediatamente. Akinan por lesa e carta completo. Bon Dia Aruba ta bay keda pendiente cu e desaroyo di esaki mirando cu nos a haci un encuesta e aña aki den Caya Betico Croes unda varios comerciante a vocifera nan preocupacion. Den e prome lunanan di e aña aki, varios comerciante a bisa Bon Dia Aruba cu nan por a constata un baho den benta entre 20 pa 50% y mas, mientras.varios otro negoshi mester a sali for di caya te hasta cera nan portanan.
Comerciantenan y situacion den Caya Betico Croes
Den nos encuesta algun luna pasa den Caya Betico Croes, Bon Dia Aruba a constata cu:
Comerciante di Punto Moda ta conta Bon Dia cu nan benta a baha te na 80% anto cu e ta hopi dificil pa nan te cu nan hasta ta pensando un otro caminda pa reloca e tienda. Nan ta haya si cu manera henter e construccion y introduccion di tram a cuminsa ta ora cu nan problemanan a cuminsa tambe. Bisiña na man robes, comerciante di Alankar ta splica Bon Dia cu su bentanan a baha alomenos 60%, e tin dos trahado fiho anto otro cu ta traha vacantie job y ta splica Bon Dia cu ya caba e mester a despedi un empleado pa motibo di con malo economia ta bayendo.
La Aruba ta conta Bon Dia cu nan ta perhudica pa tur banda pa motibo cu pa prome no tin parkeer meters cerca di nan dus hopi di nan cliente ta haya problema cu esaki, anto den general henter e asunto di parkeer tin nan hopi preocupa pa motibo cu nan cliente no tin caminda pa para nan auto. Nan ta pidi pa sikiera un parkeerplaats wordo traha den nan cercania pa e comerciantenan den e area por haci uzo di dje. Nan benta a cay entre 70 pa 80% y nan ta den un situacion basta malo caba cu ta andando desde 3 pa 4 aña caba.
Pa lesa mas di esaki click riba e link aki: ‘Benta ta sigui cay den Caya Betico Croes’ y pa mira un reportahe riba e situacion pafo di Caya Betico Croes riba e poder di compra na Aruba, click riba e link aki: “Placa no ta circulando”
