Temporada di Pasco a yega y manera ta aprecia, semper esaki ta e temporada di mas benta pa comerciantenan. Pero na e momentonan aki esey no ta e caso mas.

Bon Dia Aruba a puntra algun doñonan di negoshi den e area di playa cu yama Welcome Plaza y Local Market, pa haya informacion tocante con ta bayendo cu e benta den e luna aki y con nan ta wak e aña proximo.

Un comerciante di area di Welcome Plaza cu no a menciona su nomber, a expresa cu desde cu nan a move pa e luga nobo nan ta hayando hopi problema. Na prome luga nan no por exhibi nan mercancia banda pafo, pa motibo cu esey no ta permisibel. Di mesun manera el a comenta cu cada un negoshi mester di un dak, pa awa of solo. Ademas el a afirma cu tin biaha cu tres barco ta yega y henter e area ta rondona di hende, pero nan no ta cumpra den nan negoshi.

“Turistanan ta bin, pero nan no ta cumpra y asina e benta no ta subi”, el a sigura.

Tocante e huur, el a señala cu esey ta algo hopi costoso compara cu otro luganan cerca. Nan mester paga ‘1.000 florin pa luna’, e negoshinan di e area tampoco tin baño pa nan mes, ta existi un solo baño y nan tin cu paga 1 florin pa nan por uza esey, como tampoco tin barinan di sushi.

Tambe el a duna di conoce cu pa e motibo aki no tur comerciante ta pagando huur. Nan a haya e carta di finanzas y tin cu haci un areglo di pago, pasobra nan no tin suficiente benta, pues no ta genera entrada cu cual nan tin cu cumpra mercancia y nan mesun momento nan tin cu sobrevivi.

Bernard Buchell, doño di un kiosco na Welcome Plaza a bisa cu den e contract cu nan a haya tabata specifica cu e luga lo haya un borchi cu e nomber di e luga. El a menciona cu algun biaha turistanan ta pensa cu eynan no tin negoshi, sino deposito. Nan ta traha mas di cuatro ora sinta cu calor pa motibo cu no tin airco paden di e negoshi y asina mes nan no ta bende ni 50 dollar pa dia.

“Tur dia tin barco, tur dia den temporada aki ta yen di hende. Ayera awa a cay y nos a muha completo, asina turistanan no ta baha for di barco”, Buchell a bisa.

Ademas el a specifica cu nan mester di mas atencion di Gobierno pa e proximo aña, servicio di wifi, borchi pa señala e negoshinan, nan mesun baño sin cu mester paga y dak pa haci e area un tiki mas protegi di solo, cu tambe ta afecta nan mercancia.

Di mesun manera, el a referi cu antes e kiosconan tabata yen di hende, pa motibo cu den area cu nan tabata prome tabatin 18 kiosco. Aworaki nan ta 34 y e competencia a bira hopi grandi.

Sofia Semeleer, kende ta un comerciante di Local Market, a splica cu ora e barconan ta yega e turistanan no sa cu nan ta existi. Ora nan ta cuminsa cana rond nan ta wak cu tin kiosconan cu ta bende paña y souvenir di Aruba. E no ta keha tocante e clientenan pa motibo cu e mes a sigura cu nan ta bende hopi bon, incluso miho cu esun cu ta ubica di otro banda.

E unico problema cu e ta haya ta cu ora awa yobe, nan tin problema pa motibo cu nan no tin un structura adecua.

 

LEAVE A REPLY

Please enter your comment!
Please enter your name here