Comerciantenan por haya boet: Gobierno ta fortalece control riba prijs di canasta basico cu cambio den Prijzenverordening

Entrante 15 di augustus, gobierno di Aruba lo introduci un sistema nobo di control y sancion pa garantisa cu prijs di productonan cu ta forma parti di e canasta basico ta ser respeta. Cu e entrada na vigor di e cambionan den Prijzenverordening, Departamento di Asuntonan Economico lo haya autoridad legal pa impone advertencia, dwangsom y eventualmente boet na mayorista y minorista cu no ta cumpli cu e prijsnan maximo estableci pa gobierno.

Durante un conferencia di prensa, minister di Finanzas, Asuntonan Economico y Sector Primario, Geoffrey Wever, a splica cu e cambionan ta forma parti di e maneho di Gabinete AVP-FUTURO pa fortalece e posicion di consumidor na Aruba. Segun e mandatario, te awor gobierno tabatin posibilidad pa controla y identifica iregularidadnan, pero no tabatin e instrumentonan legal pa obliga comerciantenan pa cumpli cu e regla of pa impone sancion ora nan persisti den incumplimento.

E sistema di canasta basico ya ta existi hopi aña na Aruba. Den dje, gobierno ta determina un prijs di benta maximo pa un gran cantidad di producto considera esencial pa consumo diario. Actualmente e lista ta inclui mas o menos 1.300 producto, cu ta cubri diferente categoria di alimento, producto di uso diario y otro articulo cu ta importante pa e gasto basico di un cas.

Pa cada producto cu ta cay bao di e regulacion aki, gobierno ta calcula e margen di ganashi cu mayorista y minorista por aplica. E prijsnan oficial ta ser publica den un ministeriële regeling, cu ta sirbi como e referencia cu supermercado, minimarket y otro comerciantenan mester sigui.

Responsabilidad pa supervisa cumplimento ta den man di Departamento di Asuntonan Economico. Controladornan di e departamento ta realisa controlnan casi tur dia na diferente establecimento rond di e isla pa verifica si e prijsnan cu consumidor ta paga realmente ta coresponde cu e prijs maximo permiti.

E controlnan aki, minister Wever a indica, ta resulta den miles di inspeccion cada aña. Di acuerdo cu e cifra comparti, solamente alrededor di 2% di tur e controlnan ta resulta den algun iregularidad. Den hopi caso, e diferencia ta resultado di un fout administrativo of humano y comerciante ta haci e coreccion mesora despues cu controladornan pone nan na altura.

Sinembargo, e situacion tabata diferente ora un comerciante no kier a haci e ahuste of continua cu e mesun conducta despues di ser informa. Te cu awor, Asuntonan Economico por solamente pidi pa e prijs ser corigi, pero no tabatin base legal pa impone un boet of otro tipo di sancion si e comerciante no tabata coopera.

Segun minister Wever, precisamente e falta di posibilidad pa handhaving tabata un punto debil di e sistema existente. Esaki a motiva gobierno pa prepara un adaptacion di Prijzenverordening, cu ta incorpora autoridad pa supervisa cumplimento di un manera mas efectivo.

Cu e cambionan cu lo drenta na vigor dia 15 di augustus, controladornan no solamente lo continua cu nan control diario, sino tambe lo por sigui un procedemento administrativo ora detecta incumplimento.

Directora di Departamento di Asuntonan Economico, Maria Dijkhoff-Pita, a presenta e manera con e proceso nobo lo funciona den practica. El a splica cu e controladornan di Economische Zaken lo sigui haci e mesun tipo di inspeccion cu nan ta haci actualmente, pero e siguimento despues di constata un iregularidad lo cambia.

Ora un controlador identifica cu un producto den e canasta basico ta ser bendi pa un prijs mas halto cu e prijs maximo permiti, of cu e prijs no ta indica di forma cla pa consumidor, e comerciante lo haya un advertencia oficial. Despues di esey, e establecimento lo haya un periodo di 24 ora pa corigi e situacion.

Si despues di e plaso di 24 ora e iregularidad no a ser corigi, gobierno lo por impone un last onder dwangsom. E medida aki ta un instrumento administrativo cu ta obliga e comerciante pa cumpli cu e regla, bao menasa di consecuencianan financiero si e situacion no cambia.

Den e caso cu e comerciante sigui cu e comportamento y no cumpli cu e obligacionnan, gobierno lo por pasa na e siguiente paso, cu ta impone un boet administrativo.

Segun e informacion presenta, pa minoristanan manera supermercado y minimarket, e boet lo cuminsa na Afl. 1.250 y por subi te na Afl. 12.500, dependiendo di e gravedad di e situacion y si tin ripiticion di e infraccion.

Pa mayoristanan, cu ta e empresa nan cu ta suministra mercancia na comercio, e sancionnan ta mas halto. Den nan caso, e multa administrativo lo cuminsa na Afl. 2.500 y yega te Afl. 25.000 pa cada infraccion.

Minister Wever a enfatisa cu gobierno ta spera cu introduccion di e sistema di sancion lo cambia e comportamento di comerciantenan. Segun e mandatario, e meta principal no ta impone boet, sino crea un sistema den cual comerciantenan ta sigui e regla boluntariamente pasobra nan sa cu tin consecuencia concreto ora nan no cumpli.

El a indica cu e cambionan introduci ta representa un fortalecemento importante di e proteccion legal cu consumidor tin. Segun e, un mercado cu ta funciona bon ta exigi no solamente regla, pero tambe posibilidad pa controla cumplimento di e regla.

Gobierno a reconoce cu Aruba, manera hopi otro pais, ta sigui enfrenta influencia di aumento di prijs internacional. Desaroyonan den mercado mundial por afecta costo di importacion di hopi producto. Sinembargo, esaki no ta cambia e obligacion di comerciante pa respeta e prijs maximo cu gobierno a establece pa e productonan cu ta forma parti di e canasta basico.

Ademas di controla e prijs di benta, e sistema nobo lo aplica tambe riba e manera cu prijsnan ta ser presenta na consumidor.

Departamento di Asuntonan Economico a enfatisa cu tur producto mester tin un prijs claramente identifica. Si varios producto ta riba un mesun reki, e prijs por ser poni riba e reki, pero e indicacion mester ta claramente visibel pa consumidor prome cu e persona yega na caha pa paga.

Segun e departamento, e medida ta importante pasobra consumidor mester por sa di antemano cuanto un producto ta costa y compara prijsnan sin confusion.

Paralelamente cu introduccion di e sistema di handhaving, gobierno ta traha pa reactiva e app di control di prijs, cu actualmente no ta funcionando pa motibo di diferente dificultadnan tecnico.

Cu e app aki, e consumidor mes por reporta posible iregularidadnan directamente na Asuntonan Economico ora nan nota cu un producto di canasta basico ta ser bendi pa un prijs cu no coresponde cu e prijs maximo of ora e prijs no ta claramente indica.

Dijkhoff-Pita a splica cu aunke nan ta trahando pa soluciona e problema tecnico di e app, no ta spera cu e sistema lo ta completamente cla prome cu entrada na vigor di e cambionan dia 15 di augustus.

El a indica cu mientras cu e reparacionnan di e app keda cla, consumidornan cu detecta algun posible iregularidad por sigui entrega nan keho directamente na Departamento di Asuntonan Economico via telefon of e-mail.

Cu entrada na vigor di e cambionan den Prijzenverordening, Aruba lo tin pa prome biaha un sistema administrativo completo pa supervisa y sanciona incumplimento di e regla tocante prijsnan di canasta basico. Gobierno ta considera e paso aki manera un fortalecemento di proteccion di consumidor, mientras cu Departamento di Asuntonan Economico lo continua cu su tarea di inspeccion diario pa garantisa cu e prijsnan cu comunidad ta paga pa productonan esencial ta keda dentro di e limite legal estableci.