Den edicion reciente di Bon Dia Aruba a trece dilanti e caso cu CAPA a gana contra directiva y den e articulo aki a menciona e conexion cu CAPA tin cu SEPPA y e hecho cu den SEPPA tambe tin preocupacion andando.
SEPPA ta un sindicato y un sindicato ta un organisacion forma pa trahadornan cu ta uni y usa nan forsa pa tin un bos den e luga di trabao y cu e union aki nan ta haya e habilidad di por negocia for di un posicion di peso cu e dunadonan di trabao varios cos manera salario, beneficionan, condicionnan laboral, training y otro topiconan relaciona cu trabao. Un sindicato ta un organisacion democratico y su lidernan ta eligi pa e mesun miembronan y den e caso di SEPPA, e punto aki ta uno cu recientemente ta causando preocupacion, specificamente pa loke ta trata e eleccion di su lidernan.
Comision 11 a duna un splicacion via un comunicado unda nan a atende e preocupacion aki y amplia tocante kico esaki ta encera en realidad.
Manera a cuminsa splica, aki nos ta papia di un organisacion democratico unda mester tin un eleccion pa su lidernan y cada eleccion mester cumpli cu reglanan pa duna balor na democracia. Eleccion ta e parti sagrado di un proceso cual ta duna balor na Democracia y esaki ta contene varios etapa. Tin cu ta dura aña of mas, manera eleccion politico.
Den sindicalismo esaki ta menos, pero nos mester pasa den un proceso cu varios reglanan manera entre otro:
1. Dirigentenan den e sindicato, den forma habri ta informa tur miembro cu e sindicato ta bay tene eleccion, ariba tal fecha o den e siman o luna tal y tal;
2. Ta pidi miembronan cu ta interesa pa postula nan mes como candidato pa ser eligi, no mas tarda cu tal fecha;
3. Ta informa tur miembro kendenan ta e candidatonan;
4. Ta informa tur miembro e fecha di eleccion y lugar(nan) unda pa vota;
5. Pa e votacion mes, Dirigentenan ta prepara e urna(nan) pa tene e eleccion/votacion;
6. Despues di votacion lihe ta informa miembronan di e resultado di e votacion.
E problema ta sinta den e hecho cu segun Comision 11 e “informacion pa e 4 puntonan clave no a sucede pa e eleccion di SEPPA di dia 11 di juli 2025. Esey a sorprende miembronan na hopi centronan di Trabao, ora e responsablenan a presenta cu e urnanan pa vota. Pues e eleccion di dia 11 juli 2025, no a respeta e reglanan basico y di democracia den sindicalismo ora ta tene eleccion pa lidernan.”
Nan ta sigui detaya cu e violacion mas grandi ta cu no a tene cuenta cu statutonan di SEPPA. “Secretario General, Sra. Brito ta declara den Diario, pagina 11, dia11 juli 2025, cu ta Congreso a pidi pa eleccion di Directiva, pero nan no a haya e candidatonan rekeri pa esaki. Esaki ta trabao di e Secretario General di SEPPA, ta abo ta dirigi e Comite Ehecutivo pa ehecuta e trabaonan, ningun otro persona. Un Secretario General lo informa miembronan na 2016 caba y asina cada biaha, via un campaña di informacion pa haya miembronan pa forma parti di directiva. Sigur e lo a haya candidatonan pa directiva,” e comision a skirbi.
E directiva pa un sindicato, den e caso aki SEPPA, ta di gran importancia pa motibo cu e ta controla e finanzas. Statutonan di SEPPA den e cabes di articulo 10 ta skirbi cu mas tarda den november ta tene e congreso anual di SEPPA y den lid f, ta para cu cada 3 aña, ariba e dia di clausura di e congreso ta tene eleccion pa directiva di SEPPA. Esaki ta ser ripiti den articulo 15, lid 1. “Pues no ta Congreso/Delegadonan ta dicidi, pero ta statutonan ta dicta esaki. Pa tur hende cu dosplaca di sinti, e eleccion den SEPPA, di 11 juli 2025, no ta cumpli cu e reglanan democratico pa eleccion sindical, tampoco e ta di acuerdo cu statutonan di SEPPA.”
Segun e comision, esaki ta haci cu automaticamente e eleccion/votacion di dia 11 juli no ta valido, o ilegal. “Nos por comprende pakico tin e exigencia di Congreso=Delegadonan pa tene eleccion. Hopi acusacionnan fuerte a sali den prensa e ultimo añanan cu no tin eleccion den SEPPA. Ariba cada 10 di december, Dia Internacional Contra Corupcion, un miembro di comision11 ta manda comunicadonan na prensa local y cualnan a keda publica. Ora un sindicato ta keda añanan sin tene eleccion, esaki ta corupcion,” e comunicado a detaya.
Den e comunicado aki a trece dilanti e ehemplo di e directiva di TOPA, cual sindicato a keda 15 aña sin tene eleccion, tambe e caso di Magaly Brito, como Secretario General di SEPPA, kende tin como 12 aña sin tene eleccion. Ultimo añanan a sali skirbi tambe, cu Sra. Brito ta bay defende su mes cu su silencio, pasobra tur acusacion ta berdad, e no por defende su mes. Berdad nunca e a reacciona.
25 aña como lider maximo den SEPPA
E comision a trece dilanti cu e ta considera “ta bon pa miembronan di SEPPA sa cu Magaly Brito ta lider maximo di SEPPA for di 16 maart 2000 (aña dos mil). E tempo ey e presidente di SEPPA a pidi su retiro y Sra. Brito como vice-presidente a bira presidente. Ora e statutonan nobo a drenta na vigor, 5 februari 2010, e structura di SEPPA a cambia y desde e tempo ey SEPPA tin un Comite Ehecutivo, cual organo ta ehecuta e trabaonan den SEPPA, bao encargo di e Secretario General, kende ta e lider maximo di SEPPA. Tambe tin e directiva cu ta haci e controlnan ariba e trabaonan di Comite Ehecutivo.”
E informacion cu a comparti ta dicta cu den e congreso anual di 2010 y di 2013 tabatin e unico eleccionnan, di acuerdo cu e statutonan nobo di SEPPA y Sra. Brito a keda eligi como Secretario General. “Pues ya Sra. Brito tin 25 aña como lider maximo di SEPPA.”
Centro di e preocupacion tocante maneho den SEPPA y e tesoreria di CAPA
Comision 11 a expresa su preocupacionnan y a haci esaki bisando lo siguiente: “E Secretario General como lider maximo di SEPPA ta destruyendo reglanan corecto di democracia cu nos tabata conociendo. Si tuma na consideracion loke a pasa den e Cooperativa di Miembronan di SEPPA, CAPA, tocante un ladronicia di AWG 382.000, Comision 11 a pidi e registro di miembronan, di acuerdo cu statutonan di CAPA, pa yama reunion cu miembronan. Directiva di SEPPA a para ariba un no. Comision 11 a bay corte y corte a dicta cu comision 11 tin rason pasobra e ta para den statutonan di CAPA. Tambe e landsverordening cu ta regarda cooperativismo en general, tin mesun stipulacion, di acuerdo cu e otorgamento di e registro di miembronan.”
Comision 11 kier e registro menciona pa di acuerdo cu statutonan yama un reunion cu directiva di CAPA pa nan duna cuenta y mas detayenan pa cu e robo cu a menciona.
E comision ta sigui expresa cu “directiva di CAPA cu su tesorero ta bay apela e caso a pesar cu e decision di hues ta bisa cu entrega di e registro ta para den e statutonan di CAPA; Den e ley, landsverordening op Cooperatieve Verenigingen AB 1987 no. GT8, tabata un ley na Antiyas prome cu 1986, despues a bira ley na Aruba y cual ley ta stipula e reglanan cu Cooperativanan mester eherce. Den articulo 11; lidD; 3, e entrega di e register di miembronan tambe ta parti di esaki. Toch directiva di CAPA ta dicidi di bringa e desicion di e hues y e ley cu ta regarda stipulacionnan den Cooperativismo, den corte di apelacion. Nan no tin ni e minimo chens pa empata, corda pa kibra e decision di hues y kibra un ley existente. Loke tur hende mester analisa ta cu nan no kier pa e claridad ariba e robo di AWG 382.000 sali. E pregunta grandi ta, kico tin scondi eytras? Awor tin e menasa di un hurista, consehero hudicial di SEPPA y CAPA, den direccion di miembro(nan) di comision 11. E hurista aki kende pa motibo di a comete delito(nan) a ser saca for di Orden di Abogadonan. E no tin autoridad mas como abogado, pero toch ta menasa y pretende hasta di lanta caso contra miembro di comision 11 den corte. Tambe tur e sucedidonan aki ta pone hopi hende pensa cu loke ta pasando den SEPPA y CAPA ta pa crea un cultura pa acepta impunidad como algo legal y normal.”
E comision a clausura su comunicado expresando cu esaki “no por, nos di comision 11 ta lucha pa para e cultura malo aki.”
