E Comision di Nacionnan Uni pa Eliminacion di Discriminacion contra Hende Muhe (CEDAW) a emiti recomendacionnan amplio na Reino Hulandes, pidiendo pa un accion mas fuerte, mas coordina pa elimina discriminacion contra hende muhe y mucha muhe den tur e cuater paisnan constituyente di Reino: Hulanda, Aruba, Corsou y Sint Maarten.
Den su observacionnan conclusivo riba e di siete rapport periodico di Reino, adopta durante su di 92 sesion na februari 2026, e Comision a reconoce progreso legislativo den añanan recien, pero a lanta preocupacionnan tocante buraconan persistente den implementacion, particularmente den e partinan Caribense di Reino.
E Comision a yama bon bini na varios reforma legislativo importante adopta for di e revision anterior na 2016. Entre esakinan tabatin e Ley di Proteccion Contra-Discriminacion pa Boneiro, St. Eustatius y Saba, ampliando e mandato di Instituto Hulandes pa Derechonan Humano; amiendanan na e Ley di Terminacion di Embaraso pa amplia acceso na cuido di aborto trempan; y e Ley di Ofensanan Sexual di 2024, cu a introduci un definicion basa riba consentimento di violacion y a criminalisa acoso sexual tanto online como offline.
E Comision tambe a elogia e Ley di Proporcion Balansa di Hende Muhe y Hende Homber, cu a introduci un cuota di 33% di genero pa huntanan di supervision di companianan, y a tuma nota di e adopcion di Stop Femicidio! Plan di Accion y e Programa Nacional di Accion riba Comportacion Sexual Transgresivo y Violencia Sexual.
Sinembargo, a pesar di e avancenan aki, e Comision a conclui cu desigualdadnan structural ta persisti y cu reformanan legal no a ser iguala pa implementacion amplio y coordina.
Un preocupacion central cu CEDAW a lanta ta e “diferencianan significante” den con e Convencion ta ser implementa den henter Reino y e falta di claridad tocante su aplicabilidad directo den cortenan domestico. E Comision a urgi autoridadnan pa zorg pa e Convencion ta integra sistematicamente den legislacion, trahamento di politica y huicio den tur parti di Reino y cu hues y profesionalnan huridico ricibi un training mas fuerte riba su provisionnan.
E Comision tambe a expresa preocupacion cu e definicion legal di discriminacion no ta encera completamente discriminacion interseccional—caminda hende muhe ta enfrenta formanan di desbentaha cu ta sobrepasa otro basa riba rasa, discapacidad, status di migracion of otro factornan—of discriminacion door di actornan priva manera dunadornan di trabou y dunadornan di servicio.
Como contesta, el a pidi pa fortalece legislacion contra discriminacion, mehora mecanismonan di aplicacion y revision constitucional mas robusto pa garantisa compatibilidad di leynan nacional cu garantianan di igualdad.
Acceso na husticia ta keda un reto significante, particularmente pa hende muhe discrimina. E Comision a mustra riba bareranan den acceso na ayudo legal, contribucionnan personal halto necesario hasta ora ayudo estatal ta disponibel, y miedo di deportacion cu ta stroba hende muhe migrante indocumenta di raporta abuso.
Retraso den investigacion y persecucion di casonan di violencia basa riba genero contra hende muhe, combina cu acceso limita na cuido di trauma y sosten psico-social, ta sigui mina remedinan efectivo. E Comision a urgi Reino pa garantisa investigacionnan na tempo, kita obstaculonan financiero pa husticia, y garantisa cu denuncia di violencia no ta causa castigo di inmigracion.
Aunke e Ley nobo di Ofensanan Sexual a ser introduci, e Comision a haya cu sistemanan di prevencion y contesta pa violencia basa riba genero ta keda fragmenta, cu proteccion desigual den tur municipio y scarsedad di investigadornan specialisa.
Importante tambe ta e hecho cu e Comision a critica e cuadro neutral di genero di legislacion di violencia domestico, bisando cu e no ta reconoce violencia domestico como un fenomeno profundamente di genero cu ta hancra den desigualdad structural. E la recomenda pa revisa e definicion legal pa inclui violencia economico explicitamente y alinea cu e Convencion di Istanbul di Conseho di Europa.
E Comision tambe a lanta alarma tocante capacidad di refugio insuficiente, acceso desigual pa hende muhe sin status di residencia sigur, y gastonan di usuario cu por ser cobra pa servicio di refugio sigur. E la pidi pa amplia capacidad di refugio y acceso igual pa tur hende muhe sin importa nan status di migracion.
CEDAW a expresa su preocupacion riba e prevalencia persistente di traficacion di hende muhe y mucha muhe pa explotacion sexual y laboral den henter Reino. El a critica e porcentahe abou di persecucion y condena y a señala cu confia identificacion di victima na autoridadnan di inmigracion por descurasha hende muhe indocumenta di bin dilanti.
Particularmente controversial tabata e resultadonan relaciona cu politicanan di trabou sexual. E Comision a adverti cu politicanan local represivo a reduci lugarnan di trabou cu licencia y a pusha trahadornan sexual independiente den e sector ilegal, aumentando vulnerabilidad pa violencia. Na Corsou, a subraya cu solamente hende muhe stranhero tin permiso pa participa den trabou sexual regula bou di permisonan temporal, un sistema cu e Comision a describi como discriminatorio y cu potencialmente por hiba na explotacion.
E Comision a urgi reformanan pa garantisa cu medidanan anti-trafico ta separa for di aplicacion di inmigracion y cu regulacionnan di trabou sexual no ta aumenta vulnerabilidad.
Den e sector di salud, e Comision a identifica diferencianan den acceso na servicio di salud sexual y reproductivo den henter Reino. A señala cu aborto ta keda criminalisa na Aruba, Corsou y Sint Maarten y a recomenda pa legalisa esaki den por lo menos casonan di violacion, incesto, riesgo pa bida of salud di e hende muhe na estado, y deficiencia fetal severo.
E Comision tambe a boga pa mehora acceso na anticonceptivonan moderno, fortalece servicio di HIV/AIDS, y mehora sosten di salud mental como contesta na e aumento di e cantidad di suicidio bou di hende muhe hoben.
A pesar di progreso den representacion di huntanan di empresa, hende muhe ta sigui enfrenta discriminacion profesional, tasanan halto di trabou part-time liga na responsabilidadnan di cuido, y diferencianan di pago y pensioen di genero persistente.
E Comision a urgi implementacion acelera di cuido di mucha pagabel, medidanan mas fuerte pa encurasha responsabilidad di mayornan comparti, y transferencia rapido di e Directiva di Transparencia di Pago di Union Europeo den ley domestico. Tambe a pidi pa accion dirigi pa atende cu discriminacion di embaraso y mehora inclusion riba mercado laboral pa hende muhe cu discapacidad.
Durante su observacionnan, e Comision a enfatisa repetidamente e necesidad pa atende formanan di discriminacion cu ta afecta hende muhe cu discapacidad, hende muhe lesbiano, bisexual, transgenero y intersexual, hende muhe cu ta busca asilo y migrante, y hende muhe priva di libertad.
Preocupacionnan a inclui dependencia di e status di residencia di hende muhe migrante riba casa abusivo, riesgonan di seguridad den centronan di recepcion di asilo, uso excesivo di tumamento di decision substitui pa hende muhe cu discapacidad, y acoso y abuso di hende muhe den detencion.
E Comision a recomenda pa desconecta status di migracion for di casa den casonan di violencia, fortalece proceduranan di asilo cu ta responde na genero, y garantisa condicionnan di detencion sigur.
CEDAW a conclui cu Reino falta un strategia di igualdad di genero consolida y general cu ta basa explicitamente riba e Convencion. Politicanan di igualdad di genero ta keda fragmenta den multiple plan di accion, cu falta di coordinacion, presupuesto cu ta responde na genero y evaluacionnan obligatorio di impacto di genero.
E Comision a urgi Reino pa adopta un strategia unifica cu mecanismonan cla di responsabilisacion y financiamento adecua. Tambe a haci un yamado na e Parlamentonan di Hulanda, Aruba, Corsou y Sint Maarten pa tuma pasonan necesario pa ehecuta e recomendacionnan prome cu e siguiente ciclo di raportahe.
A pidi Reino pa dentro di dos aña provee siguimento por escrito riba recomendacionnan di prioridad selecta, incluyendo medidanan relaciona cu traficacion, programanan di salida di trabou sexual, verlof pa mayornan y reforma di aborto.
Segun cu e comunidad internacional ta marca tres decada desde e Declaracion y Plataforma pa Accion di Beijing, e mensahe di e Comision ta cla: progreso legislativo so no ta suficiente. Pa logra igualdad substancial di genero den henter Reino ta rekeri aplicacion consistente di normanan internacional, boluntad politico sosteni y accion dirigi pa garantisa cu ningun hende muhe of mucha muhe—sea na Europa of den Caribe—ta keda atras.
