Diasabra mainta den un ambiente deportivo y alegre a tuma luga e inauguracion di e edificio nobo di Comite Olimpico Arubano (COA). E evento aki a conta cu presencia di presidente di International Olympic Committee (IOC), Thomas Bach y presidente di Panam Sports, Neven Ilic.

Durante e evento tabatin un feria deportivo caminda diferente club- y organisacionnan di deporte a duna demostracion di e diferente tipo di deporte na Aruba. Esaki a inclui bowling, taekwondo, weightlifting, ahedres, y atletiek entre otro. E presidente di IOC, Bach, a pasa na e diferente demostracionnan y combersa cu algun di e coach- y atletanan presente y a reparti pinnan olimpico pa e deportistanan tambe.

Durante e ceremonia oficial, Minister di Enseñansa, Endy Croes, a hiba algun palabra na unda el a felicita COA y tur envolvi den e gran logro di e apertura di e oficina nobo di COA. El destaca cu como Minister di Deporte e ta comparti e vision di COA cual ta e bienestar y desaroyo di deporte y atletanan olimpico na Aruba.

“Deporte ta un herment poderoso. E ta asina poderoso y e ta un vehiculo cu ta crea no solamente bon hende pa sociedad, pero tambe crea lidernan ehemplar pa comunidad y pa paisnan rond mundo. P’esey nos como Gobierno di Aruba ta apoya deporte tambe den su desaroyo pa futuro,” el a remarca.

“Nos ta extremadamente feliz pa t’ey awe akinan. Mi ta para boso dilanti cu kippenvel pasobra nos a warda hopi tempo pa e oficina aki, pa e bira esaki,” Presidente di COA, Wanda Broeksma, a expresa.

Durante su discurso, Broeksma a enfatisa cu nan mision ta pa sigui inspira e atleta-, federacion-, coach- y lidernan y inulca e balornan olimpico.

Michelle Hoeverts, vice presidente di ICO y tesorero di COA, a ratifica e felicidad cu e comite completo y tur envolvi ta sinti cu e apertura di e oficina nobo aki. “Nos tabatin un soño, nos kier a haci deporte importante. Nos tabata kier duna deporte e importancia cu e merece, no pa nos, pero pa e atletanan, p’esey nos ta haci’e.”

El a splica cu COA tabata den e edificio pa casi cuater aña caba, pero no a inaugura e edificio te aworaki pa asina nan por a dun’e e toke olimpico den e diseño cu nan tabata desea. El a indica cu nan a scoge e localidad specifico aki pasobra tin hopi trafico ta pasa dilanti e edificio pa y for di scol y nan kier pa tur mucha por wak un edificio cu ta identifica cu deporte y e atletanan di Aruba.

Segun Hoeverts a sigui splica, e oficina cu a keda inaugura diasabra ta fase 1 di e proyecto. Fase 2 ta e construccion di un museo deportivo pa asina por invita e scolnan pa nan siña tocante deporte y e balor di deporte.

“Damas y cabayeros, nos ta na cas, nos a encontra nos hogar.. Esaki ta e cas di COA, esaki ta e cas di deporte, esaki ta e cas di tur cos olimpico na Aruba,” Hoeverts a finalisa.

Durante su discurso, sr. Bach, presidente di IOC, a tuma e oportunidad pa felicita COA cu e inauguracion di e edificio nobo y a remarca cu esaki lo yuda e asociacion bira un pagina den e historia di COA.

“Cu e sede aki COA lo ta den un miho condicion pa sirbi e atletanan, pa sirbi e ekiponan cu ta bay e Weganan Centro Americano y di Caribe, cu ta bay e weganan Panamericano y mi ta spera cu pa e Weganan Olimpico,” el a indica.

El a enfatisa cu e logro aki di COA ta demostra e compromiso cu deporte y tambe cu deportistanan, ken ta siña di e balor di deporte, pero cu tambe ta duna atencion na tur e aspectonan importante den deporte.

Na mesun momento Bach a elogia e trabou realisa di parti di e dos damanan lider di COA, Hoeverts y Broeksma, y a honra nan cu e reconocemento IOC Presidents Trophy pa e trabou di sostenibilidad y paz cu nan a logra.

CAO a keda estableci na 1985 ora cu Aruba a separa di Antias Hulandes. Prome cu esey, Aruba tabata representa pa e Comite Olimpico Antiano (NAOC). Na aña 1986, Aruba a ricibi e reconocemento di COI y finalmente diasabra 11 di maart a ricibi e plakkaat oficial di e reconocemento aki.

For di 1994 te cu 2023 e oficina di COA tabata situa den Compleho Deportivo Guillermo Prospero Trinidad. Un oficina cu tabata den deterioro, manera e resto di stadion cu recientemente tambe a cuminsa cu e trabounan di remodelacion di esaki, y pa rasonnan di salud tambe COA a tuma e decision di bandona e oficina den e compleho deportivo.