(AFP)—Un di e candelanan mortal di 2025 cu a devasta Los Angeles a ser causa ora chispa for di un toren di transmision fuera di uzo, propiedad di compania di coriente Southern California Edison (SCE), a pega den vegetacion seco, segun un reportahe publica diamars door di autoridadnan di bombero.
E reportahe, publica despues di un investigacion di 18 luna, ta confirma sospechonan cu SCE tabata responsabel pa Eaton Fire, cu a costa 19 persona nan bida y a causa daño na miles di cas y otro edificio na januari di 2025.
Despues di consulta cu expertonan den metalurgia y ingenieria electrico, Departamento di Bomberonan di Condado di Los Angeles a conclui den e reportahe cu e incendio “a ser causa pa un incidente electrico den un toren di transmision fuera di uzo di Southern California Edison”.
E linea aki tabata fuera di servicio pa decadas, pero ainda por a ricibi coriente y tabata situa cerca di liñanan di voltahe halto. E anochi cu e candela a cuminsa, “arconan electrico a expulsa particulanan di metal incandescente cu a cay riba vegetacion seco y inflamabel na pia di e torennan”, e reportahe ta bisa.
SCE ya a reconoce su responsabilidad. Na fin di 2025, e compania a lansa un fondo di compensacion pa victimanan di e candela pa evita procedementonan hudicial largo y costoso. Te awor, e compania a paga mas cu 375 miyon dollar na victimanan via e fondo aki, segun vocero David Eisenhauer.
“Nos curason ta cu comunidad di Altadena, y nos ta sigui apoya nan durante nan recuperacion y reconstruccion via nos Programa di Compensacion pa Recuperacion despues di Incendionan,” el a bisa AFP. “Nos a ricibi e reportahe di Departamento di Bomberonan di Condado di Los Angeles y nos ta revisando esaki. Desde un principio nos a tuma nos posibel rol den e origen di e incendio hopi serio,” Eisenhauer a agrega.
Na California, unda cambio climatico ta aumentando frecuencia y intensidad di olanan di calor y tormentanan, ekiponan di SCE ta relaciona cu varios candela den e ultimo añanan.
Segun conclusionnan di un investigacion anterior, ekiponan di e compania probablemente a contribui na e Woolsey Fire na 2018, cu a mata tres persona y a devasta e montañanan tras di Malibu.
Na mei di 2025, e proveedor di coriente tambe a acepta paga 82,5 miyon dollar pa resolve demandanan relaciona cu e Bobcat Fire, cu a kima mas cu 46.000 hectar den e montañanan di San Gabriel na 2020.
