Diadomingo anochi un video publica riba plataforma di red social Facebook a bay viral debi na e comportamento agresivo di un agente di Tourism Security Patrol Aruba (TSPA). E publicacion a haya mas cu 100 reaccion y mas cu 50 usuario a duna nan comentario—mayoria di nan condenando e falta di profesionalismo di e agente.

Den e video, por a mira e agente confrontando un persona, cual segun comentarionan ta un musico conoci den comunidad. E situacion aki tabata relaciona cu un situacion unda e musico supuestamente a parkeer na un luga no autorisa den area hotelero. No por a mira den e video con e situacion a escala, pero si por a nota cu e discusion a bira uno basta agresivo, unda e agente a hasta tira palabra derogatorio pa e musico.

Por a tende e musico bisando den Ingles cu nan ta den publico y cu e ta purbando di haci su trabao. Como respuesta, e agente a hisa su voz, declarando cu e tambe tin un trabao pa haci. Despues cu e musico a bis’e pa haci su trabao e ora, e agente a tira un palabra derogatorio. Eynan e video ta corta y no por a mira con a resolve e situacion.

Usuarionan bao di e publicacion riba Facebook a expresa nan disgusto cu e accion di e agente, bisando cu tabata un falta di respet pa un persona stima y conoci den comunidad, y un posible abuso di poder. Manera un usuario a bisa: “Nunca un security por yega asina di mishi cu un persona ohm anto net cu nos amigo Rusty lag’i nek ohm […].” otro ta bisa: “[…] Abuso di poder e cosnan ki […]”.

Algun tambe ta nota cu e comportamento ta crea un mal bista pa ambos Aruba cu TSPA:

“[…] Asina bono ta trata hende y hende asina ta duna bo compania mal nomber […].”

“Waw imposibel cu tin un security den un luga turistico shame ken el a kere cu e ta.”

TSPA ta duna declaracion
Dialuna anochi TSPA a publica un declaracion oficial atendiendo cu e incidente aki. Segun e autoridad ta splica, e incidente aki a tuma luga dia 27 di november.

A sigui aclara cu e empleado cu tabata involucra den e incidente no ta parti di TSPA mas. E autoridad a tuma accion inmediato pa reforsa protocolnan y pa implementa medidanan di re-entrenamento pa preveni cu comportamento asina sucede atrobe, manera e declaracion ta bisa.

E autoridad tambe ta expresa cu nan ta lamenta di e situacion y a duna un disculpa oficial di parti e agente: “[…] Nos ta expresa nos disculpa sincero na pueblo di Aruba y tambe na tur nos bishitantenan. E conducta mustra den e video no ta aceptabel y no ta refleha e balor, profesionalismo ni standardnan cu TSPA ta compromete pa mantene.” TSPA a afirma nan compromiso pa restaura confiansa di comunidad den servicio, enfatisando cu lo keda traha conhuntamente cu autoridad y lidernan local pa fortalece operacion.

Aunke agentenan di TSPA ta haya entrenamento di scol di polis, e tareanan principal di TSPA ta pa ta un wowo constante den e area hotelero pa patruya, yuda y duna guia na turista of localnan bishitando e area. Agentenan di TSPA no ta carga arma y en principio no tin mesun autoridad cu agentenan policial.

Lo ta pa e motibo aki cu e situacion a causa un reaccion fuerte di comunidad, unda hopi ta condena e comportamento di e agente como abuso di poder. E aña aki comunidad di Aruba a perde hopi confiansa den KPA despues di e caso lamentable di Ayden Lanoy, ken a perde su bida despues cu agentenan policial a los tiro riba su vehiculo den un persiguimento na februari. Desde e tempo ey, KPA a perde confiansa di pueblo.

Esaki ta echo un cambio global den percepcion di hende pa loke ta trata cuerponan policial. E situacion di e agente di TSPA ta recorda hopi di e poder cu agentenan di seguridad of policial por abusa, resultando den desconfiansa y—den situacionnan unda incidentenan ta bay for di man—critica fuerte.