Diabierna atardi Gobierno di Aruba a anuncia e aprobacion di otorgamento di tereno na Fundacion Salud Mental Respaldo pa construi conhuntamente cu Fundacion Mama Ties un clinica completamente nobo y moderno pa brinda cuido di salud mental di calidad halto na Aruba su comunidad.
E logro aki ta un paso importante pa fortalece e sistema di cuido di salud mental, cu e vision pa crea un instituto propio pa atencion di personanan cu condicionnan di salud mental, un facilidad cu por transforma e manera cu Aruba ta atende un necesidad social y medico cada biaha mas presente.
Durante varios aña, Aruba a confronta limitacion den e capacidad y facilidadnan disponibel pa atende personanan cu tin necesidad pa cuido di salud mental, specialmente den casonan mas severo. Den situacionnan unda atencion specialisa no ta disponibel localmente, personanan por wordo obliga pa bay pa tratamento pafo di Aruba, loke ta nifica separacion di nan famia, entorno y red di sosten.
Gobierno di Aruba ta considera cu e situacion aki mester wordo atendi di un manera structural. E meta ta pa crea capacidad local cu por ofrece atencion profesional y digno, mientras ta brinda mas sosten na famianan y na comunidad.
Minister Rene Herdé a enfatisa e importancia di e iniciativa y e necesidad di Gobierno pa busca tur posibilidad pa haci e proyecto un realidad. Segun e minister, e desaroyo di un facilidad di e tipo aki ta representa un inversion importante na bienestar di pueblo di Aruba.
E necesidad pa mehora e servicio di salud mental ta toca un parti significativo di nos sociedad. E impacto no ta limita solamente na e personanan cu ta busca tratamento, sino tambe nan famia, amigonan y otro personanan den nan circulo cu ta wordo confronta diariamente cu e realidad aki.
E iniciativa stimula den colaboracion cu sector priva y otro partnernan ta contribui cu inversion, conocemento y capacidad profesional. E colaboracion entre sector publico y priva ta esencial pa logra un facilidad cu ta sostenibel y cu por responde na e necesidadnan di Aruba.
Ademas di amplia e facilidadnan, e vision ta pa inverti den profesionalisacion y formacion di personal, pa Aruba por construi e capacidad necesario pa ofrece tratamento specialisa localmente. Esaki ta inclui busca forma y capacita mas profesionalnan den e area di salud mental, den colaboracion cu sector di salud y institucionnan relevante.
“Nos mester crea e posibilidad pa un persona cu tin necesidad pa cuido di salud mental por haya e atencion cu e mester aki mes na Aruba, cerca di su famia y su red di sosten. Esaki ta un inversion no solamente den salud, sino pa dignidad y calidad di bida,” Minister Herdé a elabora.
Gobierno ta considera e iniciativa como un paso importante pa modernisa e servicio di salud mental na Aruba y pa crea un sistema unda personanan cu tin necesidad pa cuido specialisa no mester sinti cu nan ta sin opcion.
Cu e proyecto aki, Aruba ta mira pa futuro y ta duna espacio pa e capacidad di cuido crece hunto cu e necesidad di comunidad y unda cada persona por haya acceso na un servicio profesional, humano y digno, aki mes na nos isla.
