Despues di hopi aña di atraso den entregamento di cuentanan anual di Gobierno, Aruba a logra pone un fin na e atraso historico y ta actualmente al dia cu su cuentanan anual. Cu entrega di Jaarrekening 2025 algun siman atras, Gobierno a completa un proceso importante pa reestablece orden, disciplina y transparencia den maneho financiero di Pais.

Como siguiente paso den e proceso di fortalecemento di maneho financiero publico, recientemente a firma un convenio cu SOAB, un compania di controlaria financiero, pa ehecuta auditoria riba e cuentanan anual di Gobierno corespondiente cu 2026 y 2027.

Minister di Finanzas, Asunto Economico y Sector Primario, Geoffrey Wever, ta indica cu e paso aki ta importante pa consolida e progreso cu a ser logra y pa evita cu Aruba bolbe cay den e situacion di atraso cu tabata caracterisa e administracion financiero durante hopi aña.

“Nos no kier a solamente elimina e atraso. Nos kier construi un sistema financiero cu ta funciona structuralmente, cu control, transparencia y responsabilidad. Aruba mester por presenta su cuentanan anual na tempo y e cuentanan mester por pasa door di un auditoria profesional. Esaki ta parti di pone e situacion financiero di Pais na ordo y manten’e na ordo,” Minister Wever a declara.

E convenio cu SOAB tin dos obhetivo importante. Di un banda, e ta sigura cu auditoria di Jaarrekening 2026 y 2027 por wordo ehecuta door di accountantnan profesional, creando e base necesario pa e cuentanan anual di Gobierno por wordo certifica. Di otro banda, e periodo aki lo wordo uza pa fortalece capacidad di CAD, e instancia cu normalmente ta encarga cu auditoria di e cuentanan anual di Gobierno.

E intencion ta pa CAD uza e periodo 2026-2027 pa sigui desaroya su capacidad, conocemento y organisacion interno, pa despues por tuma e responsabilidad di e auditorianan di nobo. Asina Gobierno no ta solamente busca un solucion pa awe, pero ta inverti simultaneamente den un solucion duradero pa futuro.

E financiamento pa e trayecto ta bini for di Landspakket y ta forma parti di “Thema A – Financieel Beheer”, cual ta wordo ehecuta den cooperacion cu Hulanda. E programa aki ta enfoca riba fortalecemento structural di administracion y control financiero di Pais.

Segun Minister Wever, e combinacion di pone e jaarrekeningnan al dia, introduci auditoria profesional y simultaneamente fortalece CAD ta representa un siguiente fase den modernisacion di maneho financiero publico.

“Credibilidad financiero no ta algo cu bo logra cu un solo decision. Bo ta construi esaki paso pa paso, a base di disciplina, institucionnan fuerte y procedementonan cu ta funciona. Nos a elimina un atraso di hopi aña. Awor nos ta concentra pa sigura cu e situacion aki ta bira e norma y no un excepcion,” minister Wever a finalisa.