Gabinete AVP-FUTURO ta sigui tuma decisionnan strategico pa garantisa continuidad di servicio energetico, proteha e economia nacional y mantene stabilidad pa tur ciudadano. Den e contexto ey, Minister di Finanzas, Asunto Economico y Sector Primario, Geoffrey Wever hunto cu Director Robert Henriquez a formalisa un acuerdo di prestamo cu Fuels Marketing & Supply Aruba N.V. (FMSA) pa un suma di Afl. 7 miyon, destina specificamente pa elimina e torennan industrial TOSI y MHI riba e tereno di Refineria di Aruba N.V. (RDA).
Conseho di Minister di Gabinete AVP-FUTURO e aproba pa den presupuesto aloca e suma aki y despues Minister Wever a keda autorisa pa Parlamento di Aruba pa haci e prestamo aki.
E decision aki ta bay hopi mas leu cu un inversion den infrastructura di refineria. E torennan industrial ta den un estado cu ta representa un riesgo serio pa e operacionnan di RDA. Si no elimina nan na tempo, tin un peligro real cu nan por cay den otro, cu por obstaculisa seriamente e sistema di suministro di combustibel cu Aruba ta depende riba dje pa genera electricidad. Esaki ta haci e proyecto un asunto di seguridad energetico nacional y un condicion indispensabel pa mantene nos economia funcionando.
Minister Geoffrey Wever a indica cu un gobierno responsabel mester actua proactivamente ora interesnan esencial di e pais ta den wega.
Gobierno a constata cu RDA no tabata dispone di e recurso financiero necesario pa por financia e inversion urgente aki cu su propio medio. Sin intervencion di Gobierno, RDA lo mester recupera e costo di e inversion aki door di aumenta su groothandelsmarge. Eventualmente, esaki lo a resulta den prijsnan mas halto pa gasolin y diesel pa ciudadano y comerciante, cu posteriormente lo a sinti esaki den e costo di transporte, distribucion y finalmente den prijs di productonan y servicio na Aruba.
Door di tuma e decision pa financia e proyecto, Gobierno ta evita cu e costo di e inversion keda transferi directamente na e consumidor. Esaki ta forma parti di e maneho consistente di Gabinete AVP-FUTURO pa proteha e poder di compra di nos ciudadanonan y limita presion inflacionario na un momento cu costo di bida internacionalmente ta sigui bao di presion.
Diferente na un prestamo convencional, e acuerdo ta impone condicionnan rigoroso cu ta fortalece e posicion di Gobierno durante henter e periodo di financiamento. E inversion lo tuma luga solamentevdespues cu tur condicionnan tecnico y legal a ser cumpli.
Ademas, Gobierno a retene e derecho pa, si e interes publico ta exigi esaki, converti e prestamo total of parcialmente den un inversion di capital den RDA. Esaki ta duna Pais Aruba un instrumento adicional pa proteha patrimonio publico y mantene control strategico riba e inversion.
Minister Wever a conclui cu e acuerdo ta representa exactamente e tipo di gobernacion cu Aruba mester: un gobierno cu ta actua prome cu e problema bira crisis, cu ta proteha placa publico y cu ta tuma decisionnan cu ta fortalece stabilidad economico y bienestar social.
