Minister di Finanzas, Asunto Economico y Sector Primario, mr. Geoffrey Wever, ta informa cu Gabinete AVP- FUTURO a entrega su contestacion oficial riba preguntanan ricibi di Parlamento riba e concepto di ley pa e prome presupuesto AIOF 2026 y 2027. Entrega di e “Nota naar aanleiding van het Verslag” ta parti di e proceso legal  pa pidi Parlamento su aprobacion pa e prome presupuesto di e fondo di inversion AIOF 2026 y 2027. 

E proyectonan di inversion proponi pa aprobacion di Parlamento ta dirigi riba entre otro mehoracion di infrastructura, facilidadnan di enseñanza, renobacion di bario, y fortalecemento di servicio di gobierno. E concepto di presupuesto entrega na Parlamento ta contene inversionnan strategico pa 2026 y 2027. E recursonan ta destina entre otro pa facilidadnan di enseñanza, renobacion di bario, fortalece servicio di gobierno, renoba facilidadnan publico, mehora infrastructura y stimula desaroyo sostenibel di Aruba.

E prome presupuesto AIOF 2026- 2027 ta resultado di ehecucion di e strategia y maneho di Gabinete AVP-FUTURO. Como prioridad number 5 riba pagina 4 di e Programa di Gobernacion Gabinete AVP- FUTURO 2025–2028 creacion di un fondo di inversion ta un realidad. Landsverordening Algemeen en Investerings- en Ontwikkelingsfonds di 9 di juli 2026 ta e ley cu ta crea oficialmente e fondo di inversion AIOF.

Ta importante pa accentua e impacto di hancra e fondo di inversion AIOF den ley pa Aruba su desaroyo. Como instrumento di maneho, tur gobierno desde 9 di juli 2026 ta dispone di un instrumento legal pa inverti na un manera structura fondonan publico na beneficio di Aruba su desaroyo. Esaki ta forma parti di e Gabinete AVP-FUTURO su vision: Gobernacion di nos pais mester tin un, y solamente un meta: haci loke ta bon pa henter nos comunidad. AIOF ta un instrumento financiero hancra den ley y conecta na un agenda di inversion multianual, pa atende necesidadnan di awe y prepara Aruba pa futuro.

Despues di entrega oficial riba 6 di augustus 2026 di e “Ontwerp-landsverordening tot vaststelling van de begroting van het Algemeen Investerings- en Ontwikkelingsfonds voor de dienstjaren 2026 en 2027” na Parlamento, Gabinete AVP-FUTURO a ricibi e Parlamento su preguntanan oficial (het Verslag) riba 14 di september 2026. Como parti di e proceso legal, Gabinete AVP-FUTURO a duna contestacion riba tur 404 pregunta. Cu entrega awor di gobierno su contestacion oficial na Parlamento, e siguiente paso ta tratamento di e prome presupuesto AIOF 2026- 2027 pa Parlamento.

Minister Geoffrey Wever ta remarca cu AIOF, Pais Aruba ta dispone di un instrumento financiero hancra den ley y conecta na un vision di largo plaso pa Aruba. AIOF ta facilita planificacion di inversionnan di gobierno y ehecucion di esaki durante varios aña. Esaki ta tambe un di e motibonan, banda di ta prioridad di Gabinete AVP-FUTURO cu nos a crea via ley e fondo di inversion. Ley ta crea e base pa tene cuenta cu e tempo cu ta tuma pa e preparacion di proyectonan, tempo di ehecucion, prioridadnan y capacidad di ehecucion di sector publico y sector priva. Ta un realidad cu banda cu preparacion di proyectonan ta tuma tempo, ehecucion di proyectonan tambe segun minister Geoffrey Wever.

Cu e inversionnan proponi pa 2026 y 2027, Gabinete AVP-FUTURO ta duna contenido concreto na su compromiso pa mehora calidad di bida, fortalece servicio publico y crea e condicionnan pa desaroyo economico sostenibel di Aruba.

Minister Geoffrey Wever ta gradici conseho di minister pa e trabao eherci y den nomber di Gabinete AVP-FUTURO ta invita tur hende pa keda pendiente pa e tratamento oficial di e prome e prome presupuesto AIOF 2026 y 2027 den sala di Parlamento.