Parlamentario Endy Croes (MEP) a expresa su indignacion contra e falta di vision y accion di Gobierno di Aruba en conexion cu e desaroyonan petrolero historico cu ta tumando luga den nos region. Segun e parlamentario, mientras Merca ta yega na un acuerdo di 100 aña pa maneha e reservanan di petroleo na Venezuela, e gabinete actual di Aruba ta bira lomba pa e realidad aki, perdiendo un oportunidad unico pa reactiva e di dos pilar economico pa nos pais.

Oportunidad di ORO pa Aruba

Croes a splica cu despues di e cambionan politico na Venezuela dia 3 di januari ultimo, e panorama regional a cambia drasticamente. E fraccion di MEP a visualisa e potencial aki mesora y a adresa e tema den mas di cinco conferencia di prensa. Ademas, den lunanan di Februari y April, MEP a presenta dos mocion cu a wordo aproba unanimamente pa Parlamento. E mocionnan aki tabata instrui Gobierno pa haci e maximo esfuerso pa sinta na mesa cu socionan strategico den e area petrolero y pa explora oportunidadnan nobo pa e tereno di refineria.

Sinembargo, e parlamentario a critica cu Gobierno te cu awor no a duna atencion na e mandato di Parlamento, cual el a califica como un “falta di respet total”. En bes di probecha e interes di companianan Americano cu kier inverti mas di 200 biyon dollar den e region, Gobierno a opta pa firma e acuerdo HART dia 16 di juli ultimo cu Statssecretaris Van der Burg, pa laga tres experto di Hulanda dicidi riba futuro di e tereno di refineria.

Negociacionnan entre Merca y Venezuela

Citando e anuncio oficial di Trump di 28 di augustus 2026, confirma pa CNN, Reuters y otro medionan internacional, Croes a destaca cu Merca a cera un acuerdo historico di 100 aña cu Venezuela bou liderazgo di Marco Rubio. E deal aki lo permiti multinacionalnan Mericano maneha 17 campo di petroleo den e Faha di Orinoco y Lago di Maracaibo. E meta di e plan aki ta pa aumenta e produccion actual di mas di 1 miyon bari pa dia pa 3 miyon bari den corto tempo, y alcansa 5 miyon bari pa dia na 2030. Di e manera aki, Merca lo garantisa acceso directo na 65 mil miyon bari di petroleo di e reservanan Venezolano, reduciendo su dependencia di otro regionnan di mundo.

Posicion strategico di Aruba y e impacto economico

E parlamentario a enfatisa cu Aruba ta posiciona di un forma geografico strategicamente perfecto pa forma parti di e deal aki. E pais ta conta cu wafnan profundo apto pa barconan di gran tamaño, tankinan di almacenamento substancial y infrastructura cu por wordo adapta pa e operacionnan aki.

Croes a conclui enfatisando cu e oportunidad di “ORO” aki, cu a presenta despues di 3 di januari ultimo, por bira e di dos pilar economico cu ta batiendo na porta di nos pais. Segun e parlamentario, e desaroyo aki lo por crea miles di cupo di trabou cu salarionan super bon paga y genera un impulso economico masivo, specialmente pa San Nicolas y pa e economia di Aruba den su totalidad. E parlamentario ta lamenta cu Gobierno ta bira lomba pa e realidad aki y a reitera cu e Gobierno aki mester bay cas pa nos por cambia direccion y logra cosnan grandi pa nos pais Aruba.