Den ultimo simannan, comunidad Dominicano na Aruba a keda sacudi pa incidentenan fatal y impactante. Awo esaki tambe ta hayando atencion na Republica Dominicana y entre e diaspora Dominicano.
Fundacion Dominicanos Unidos en Aruba a publica un reaccion riba rednan social lamentando “profundamente e morto tragico di dos ciudadano Dominicano den un accidente fatal di transito”, referiendo na e incidente dilanti Wind Creek Casino, cu a cobra bida di Josely Paulina Vasquez Gonzalez y Carlos David Vialez Valerio. Den nan post, e fundacion a expresa “condolencia pa famia, amigo y henter comunidad Dominicano na Aruba.”
Y apenas algun dia despues, e mesun fundacion a lamenta “e morto di e hoben Dominicano, Ronal Heredia-Heredia di 17 aña, kende ayera tabatin un accidente di trafico fatal di cual e no por a sali ileso. E ta un hecho cu ta yena di tristesa y conmocion henter e comunidad multicultural di pais Aruba.”
Denny Olivo, e personalidad tras di e pagina OlivoInforma, kende regularmente ta comparti sucesonan relaciona cu e diaspora Dominicano, tambe a publica tocante e morto di e pareha. Den un video, Olivo ta cuestiona “kico ta pasando cu nos hende na Aruba, cu ta bayendo for di man?”
“Wak con nos a perde e pareha Dominicano aki,” el a bisa, contando con e pareha tabata crusa caya “man wanta”, ora cu “un vehiculo a yega y bay cu nan. El a bay cu nan, cu tur cos. E no a ni stop pa mira ken el a trapa, ni pa visualisa kico ta loke a sucede,” el a critica. El a conta con autoridadnan na Aruba a detene un muhe pa investigacion. “Si, pasobra tin algo straño. Con abo ta core na un lugar unda tin asina hopi peaton na un velocidad asina?” Olivo a menciona cu tin un grupo grandi di Dominicano cu a haci nan bida na Aruba, y cu tin algo straño pasando. El a recorda un caso impactante tambe recientemente na Aruba den cual a descubri e curpa di Luz Divina Paulino den un freezer na Solito. “Corda cu algun dia atras, a papia di captura di un hoben cu a [asesina] esun cu incluso reconoc’e como su yiu. E mes a keda deteni na Republica Dominicana pa ser manda pa Aruba pa responde pa e hechonan.”
Tocante e comunidad Dominicano, Olivo a bisa: “Nos hendenan, nos Dominicanonan ta bay pasa algun dia, ta bay cu vakantie, ta bay residi na e paisnan ey. Y ta lamentable ora autoridadnan ta duna e informacion aki, cu Dominicanonan mester ricibi e informacion hopi tristo aki.”
Ademas, e pagina ODN (Opiniones Democraticas y Noticias), dedica na noticia y informacion riba rednan social, cu sede na Santo Domingo, tambe a publica tocante e incidente di hit & run y e asesinato di Luz Divina Paulino. Igualmente, ciudadanonan Dominicano particular tambe a comparti y discuti e noticianan aki, expresando preocupacion y tristesa pa e sucesonan recien.
E hecho cu den poco tempo comunidad Dominicano a perde cuatro persona di manera impactante (Luz Divina Paulina, asesina; Josely Paulina Vasquez Gonzalez y Carlos David Vialez Valerio den hit & run; y Ronal Heredia-Heredia den accidente di trafico) a conmociona e comunidad, cu a expresa nan alarma y alabes condolencia relaciona cu e hechonan. Algun tambe a expresa preocupacion pa e coincidencia. “Cu Dios hinca su man na Aruba pasobra tin hopi caso ta pasando,” un usuario di Facebook a comenta.
