E siman aki e comunidad Dominicano na Aruba tabata di fiesta patria, ya cu dialuna ultimo nan a conmemora e di 173 aniversario di independencia di nan pais natal of di nan ancestronan.
Pa duna contenido na e fecha historico aki, Consulado General di Republica Dominicana a organisa un acto di ponemento di ofrenda floral riba plasa Juan Pablo Duarte situa na altura di hospital bieu. For di cu e plasa aki a wordo construi tur aña nan ta organisa e acto aki cu ta uno di e mas protocolario cu ta tuma luga riba nos isla cu presencia te hasta di cuerpo uniforma di bombero boluntario y honor na e banderanan.
E ceremonia aki tabata uno bon organisa y alegre cu a conta cu presencia di presidente di Parlamento, drs. Mervin Wyatt-Ras; tambe representantenan di Gobierno di Aruba pa medio di minister di Asuntonan di Integracion, Benny Sevinger y hefe di Relacion Exterior Edwin Abath, ademas di mas miembronan di e diferente fraccion di Parlamento. Ademas di e miembronan di e cuerpo consular acredita na Aruba, entre otronan.
Tambe e miembronan di e comunidad Dominicano na Aruba a haci acto di presencia den e acto protocolario aki. Sinembargo algun sector politico di e Partido Revolucionario Dominicano su seccion na Aruba a emiti un nota di prensa expresando nan disgusto ya cu nan no a ricibi un invitacion formal di parti di nan consulado. E directiva di e PRD na Aruba a considera esaki como “un falta di respet” na nan maximo lider y Canciyer Ing. Miguel Vargaz Maldonado. Nan a laga sa cu lo traha un rapport di e “desagradabel experiencia aki”.
E mesun dia den oranan di anochi, Fundacion Dominicana Arubanse Juan Pablo Duarte a organisa un recepcion na Riu Palace cu a conta cu un grupo considerabel di invitadonan. E tabata un anochi masha ameno y agradabel.
