Dialuna 23 di februari a tuma luga e di dos y ultimo sesion di tratamento di caso Caret, cu ta draai rond di dos agente policial, M. Violenes y R. Dirksz, ken a tira e hoben Ayden Lanoy di 19 aña mata dia 9 di februari 2025. Comunidad a sigui di cerca e caso y na mas di un ocasion ciudadanonan a vocifera nan deseo pa husticia den e caso aki. Pero exigencia di castigo di Ministerio Publico (OM) a shock tur hende y a ocasiona un ola di malcontento enorme den henter comunidad.

Un politico cu a reacciona a traves di su pagina di Facebook riba e exigencia di OM tabata Miguel Mansur. “Inaceptabel! Trabao di polis no ta facil y mi ta agradecido pa e orden y seguridad cu nan ta brinda. Sinembargo, cu dos agente ta los 18+ tiro y mata un hoben pa kisas no obedece instruccion di trafico ta nada menos cu homicidio,” el a enfatisa.

Mansur a indica den su publicacion cu e hecho cu fiscal ta pidi 12 luna ta manda un señal cu esnan encarga pa proteha y sirbi tin inmunidad di responsabilidad pa nan accionnan. “Sea ta Ayden of e pashent psikiatrico cu a ser mata na Pos Abou recientemente pa agentenan policial, esnan encarga cu proteha y sirbi mester ser teni mas of sikiera mes responsabel cu cualkier otro ciudadano,” el a subraya.

El a agrega cu OM a perde e oportunidad pa manda un señal claro cu abuso di poder pa agentenan policial no lo ser tolera y alabes a remarca cu a faya e mesun KPA, riba cual henter comunidad ta depende pa seguridad, di mustra cu “webonan putri den un organisacion lo ser teni mes of mas responsabel cu cualkier otro ciudadano.”

El a señala cu e hecho cu niun dia e dos sospechosonan a ser deteni pa interogacion ta otro muestra di e falta di trato igual na man di OM. “Esaki lo disminui confiansa den Ministerio Publico mas ainda – tempo pa reorganisacion,” el a bisa.

E caso, cu a hala atencion di publico durante e ultimo lunanan, a lanta un debate intenso riba henter e isla tocante responsabilisacion, confiansa den cuerpo policial, y e implicacionnan mas amplio pa husticia na Aruba.

E reaccion den comunidad tabata di indignacion y profundamente emocional. Riba rednan social residentenan a expresa nan frustracion pa loke ta trata e caso. Hopi a enfatisa e importancia di aplicacion igual di e ley subrayando cu ningun hende mester ta riba ley. Mientras cu otronan a expresa nan disgusto grandemente pa con e sistema hudicial ta funciona na Aruba.

Caso Caret a bira mas cu djis un asunto di sala di corte; el a evoluciona den un reflexion mas amplio riba e relacion entre comunidad y esnan encarga cu ehecucion di ley. Aruba, como un isla y un comunidad chikito, hopi biaha ta experencia casonan huridico di perfil halto na un manera particularmente personal. Y debi na e tamaño di e isla, hopi hende conoce personalmente individuonan envolvi, sea directamente of indirectamente, loke por intensifica reaccion di publico.

Den e caso aki, comunidad completo a biba e dolor di un mama, un tata, pareha, famia y amigonan cu a perde nan familiar hoben na un forma asina cruel.

Pa famianan di e victima, e hoben Lanoy, e exigencia di castigo tabata manera un baño di awa friu y no por a kere cu e personanan cu a mata nan yiu, ruman, pareha, nieto, sobrino y amigo, tin e posibilidad di ni sikiera bay prison, mientras nan si tin cu carga un sufrimento cu nunca lo termina pa accionnan di e mesun dos persona aki.

Hopi residente ta mira e caso aki como uno definitivo pa e sistema di husticia di Aruba. E manera cu e caso ta ser maneha, y sobretodo e sentencia final por tin efectonan duradero riba confiansa publico. Pa comunidad e caso ta tocante mas cu dos ser humano, e ta tocante demostra cu e sistema hudicial ta traha manera mester ta, specialmente ora tur wowo ta riba nan.

E proximo simannan lo keda carga cu anticipacion mientras e isla ta warda e decision di corte. Sin importa e resultado, miembronan di comunidad ta uni den un aspecto: e deseo pa claridad y husticia.

Pa awor, e isla ta vigila y warda, sperando cu e proceso legal lo brinda resolucion y reenforsa e balornan di responsabilisacion, husticia, y respet pa e estado di derecho cu ta sostene e sociedad Arubano

Fiscal a delinea su posicion y a detaya e castigo cu e ta kere ta hustifica, pero manera ta norma den casonan penal, e exigencia di castigo ta representa e evaluacion y recomendacion di e fiscal; e decision final awor ta den man di hues.