Comunidad local y hasta turistanan indigna pa maneho di CCC

Recientemente por a nota cu Dogcatcher di CCC ta mas activo riba caya, retirando cachonan cu nan ta considera indesea for di caya. Sinembargo, e maneho ‘catch and kill’ di Centro di Control di Cacho a genera indignacion entre turistanan cu ta frecuenta nos isla, ademas di consternacion entre e fundacionnan di bienestar animal local.

Parti di e problema a parce di a cuminsa na momento cu fundacionnan local cu ta cuida cachonan riba caya a cuminsa nota cu algun di e cachonan bao nan encargo a cuminsa ‘desaparece’. Riba rednan social franticamente tabata busca informacion riba e paradero di e animalnan aki.

Turistanan cu sa frecuenta nos isla ta e donadornan mas grandi na e fundacionnan. Es mas, mayoria di fondonan cu e fundacionnan pa bienestar animal riba nos isla ta ricibi, ta bin di exterior, di turistanan cu stima nos isla y nos animalnan. Cantidad di cacho crioyo tambe ta adopta den exterior, principalmente na Merca.

Na momento cu algun di e turistanan aki a ripara cu e cachonan cu e fundacionnan tabata cuida riba caya – cachonan cu ta sterilisa y ta ricibi atencion veterinario paga pa e fundacionnan – a cuminsa desaparece, tabatin miedo cu dogcatcher a piki e cachonan en cuestion, cu resultado nefasto cu ta mata e animalitonan.

Den e grupo di Facebook ‘Street Dogz of Aruba’, usuario R.H. a post un comentario cuestionando paradero di un cacho. “Puntra Bureau City Inspector kico nan a haci cu e cacho Kiwi kende tabata sterilisa y cu microchip, cu brutalmente nan a retira for di beach anteriormente e luna aki. Entreg’e back na nos Y presenta un reporte completo ademas di debolbe TUR fondo cu nos a gasta salbando e cacho aki for di man di ciudadanonan di BO isla. Bo ta usando NOS placa di impuesto pa comete asesinato riba e isla infeliz aki scondiendo tras di leynan inhumano’. E comentario aki tabata haci referencia na otro post, den cual usuario D.L.O. a informa cu BCI a mata e cacho en cuestion, Kiwi.

E problema principal ta cu no ta compronde pakico gobierno di Aruba a scoge pa un maneho di trapa y mata cachonan riba caya, mientras mundialmente ta comproba cu e maneho aki no ta efectivo pa controla sobrepoblacion di cacho. E fundacionnan durante añas ta bin ta boga – y practica mediante donacionnan – un campaña di TSR, esta trap, sterilise, release (trapa, sterilisa, libera). Door di trapa, sterilisa y libera e cachonan, ta preveni cu nan ta sigui reproduci riba caya y poco poco ta caba cu e problema. Gobierno no a duna ningun clarificacion pakico ta opone TSR. Anualmente, na Aruba ta mata alrededor di 8mil cacho y pushi.

Usuario A.C. a comenta cu el a skirbi un carta na American Airlines, solicitando nan ayudo pa un programa di sterilisacion. “Mi a papia pa añas di un suma di $2 pa ‘control di animal’ poni riba tur ticket pa drenta Aruba. Si un aerolinea impone e suma, y cada luna ta deposita e placa den un cuenta di banco di un FUNDACION pa animalnan, gasto no ta bay ta un problema mas. Mi a skirbi y manda e carta. Ta bal la pena.” El a sugeri pa haci Kiwi e cara di e campaña di sterilisacion.

Tin otro grupo riba Facebook cu ta hopi popular entre turistanan cu ta bishita Aruba, den cual nan ta comparti informacion y tips pa nan vakantie riba nos isla. Riba e grupo aki, All Things Aruba, varios turista tambe a expresa indignacion pa e maneho cruel di CCC y dogcatcher, y hasta a promove un peticion na prome minister, Evelyn Wever-Croes, pa atende cu e asunto.

Riba un post detayando e morto di Kiwi, usuario M.P.R. a comenta: “Ta asina tristo cu nan ta ricibi asina hopi placa di turismo, pero nan no por inverti placa pa yuda cu e poblacion di cacho di caya.” E.O.L a agrega cu ‘dogcatcher ta mata nan di forma inhumano’.

J.C.Q., riba e mesun post, a comenta cu ‘Kill Cage di Aruba ta askeroso. Mi a skirbi biaha tras biaha na gobierno. E ta un decision horibel pa tuma bida di e cachonan aki. Aruba mester tin berguensa pa e acto horibel di crueldad aki’. Asina tabatin casi 50 comentario di turista, cuestionando y criticando e maneho di dogcatcher y CCC.

Ya den pasado tabatin critica pa e forma con dogcatcher di Bureau City Inspector a trata animalnan mientras ta atrapa nan pa hiba nan CCC. Entre otro, a critica cu a mara e cacho nan pata y a lastra nan for di nan horea, causando nan dolor innecesario. Ademas, segun e fundacionnan di rescate animal, e manera con ta pone cachonan drumi na CCC ta innecesariamente cruel y inhumano.

Riba un post den Street Dogz of Aruba, den cual a comparti un articulo di un portal noticiero online local tocante e personal di BCI cu ta traha cu dogcatcher, usuario M.F. a cuestiona si un trahador di BCI ‘tabata e parti mas grandi di e problema, no e solucion. Mi a scucha e nomber como un abusador. Mi ta fout?’

Mientras tanto, D.B. a comenta: “Ta un ‘Dog Gestapo’ NO ta manera pa pone turistanan bin back e isla. Mayoria di nos no ta cansa di cachonan riba beach, de hecho, nos gusta nan. Pa mira e crueldad aki tuma lugar na cualkier nivel ta djis pone un luz malo riba e isla y ta pone Aruba mustra barbarico. Nos ta haci tur loke nos por na cas pa preveni esaki, y nos no ta bay un vakantie bunita pa mira e CCC actuando salvahe contra e pober animalnan aki. Si bo no tin turismo, kico bo lo tin? Mi ta kere e isla lo sufri teribel! Hende ta bay cuminsa papia tocante Aruba, y no di un bon manera”, el a adverti.