(AP) – Pa su klas, docente di matematica Aña Sepulveda kier a haci geometria algo leuk. El a pensa cu su studiantenan cu ta “fanatico di futbol” lo ta interesa den siña con e conceptonan di matematica ta aplica na e deporte. El a pidi ChatGPT pa ayudo.
Dentro di seconde, e chatbot a crea un plan di les di 5 pagina, te hasta ofreciendo un tema: “Geometria ta tur caminda den futbol – riba veld, den e bala y te hasta den e diseño di stadionnan!”
E tabata splica e formanan y angulonan den campo di futbol. E tabata sugeri temanan pa cuminsa combersacionnan den klas; “dicon e formanan aki ta importante den e wega? E tabata propone un proyecto pa e studiantenan diseña nan propio cambio of stadion di futbol utilisando e liniaalnan y demas herment.”
“Usa AI a cambia tur cos p’ami,” Sepulveda a comenta, ken ta duna les na un scol di idioma duo na Dallas y tin ChatGPT pa traduci tur cos den Spaño. “E ta yuda’mi cu plania mi lesnan, comunica cu e mayornan y aumenta e participacion di studiantenan.”
Den henter e pais, hermentnan di inteligencia artificial ta cambiando e profesion di docente mientras docentenan ta usando nan pa yuda skirbi werkboek of proefwerk, diseña lesnan, yuda cu controla y duna punto y reduci e trabao di documento. Pa medio di duna nan mas tempo, varios ta bisa cu e tecnologia a haci nan miho na nan trabao.
Un encuesta publica diaranson pa Gallup y Waltom Family Foundation a haya 6 den 10 na Merca. Docentenan trahando den scolnan publico yama K-12 a usa hermentnan di AI pa nan trabao durante e ultimo aña escolar, cu uso mas pisa den medio di docentenan di scol secundario y docentenan di scol vocacional. El a haci un encuesta cu 2,000 docente den henter e nacion den april.
E participantenan cu a usa hermentnan di AI semanal ta calcula cu esaki ta spaar cerca di 6 ora pa siman, sugeriendo cu e tecnologia por yuda alivia e cansancio di e docentenan, segun Gallup su consehero Andrea Malek Ash, ken a skirbi e rapport.
Estadonan ta publica guianan pa usa hermentnan di AI den klas
Mientras scolnan ta nabega e preocupacionnan tocante abuso di studiante di e tecnologia, algun tambe ta introduciendo e guianan y training pa docentenan pa asina nan ta informa y evita shortcut cu ta afecta e studiantenan.
Cerca di 2 docena di estado tin guia di nivel estatal pa AI den scolnan, sinembargo e extento cu cual esaki ta aplica na scolnan y docentenan no ta algo uniforme, segun Maya Israel, ken ta profesor asociado di tecnologia educacional y ciencia di computer na University of Florida.
“Nos kier garantisa cu AI no lo reemplasa e decisionnan y huicio di docentenan,” Israel a bisa.
Si docentenan ta usando chatbot pa controla y duna puntuacion, nan mester ta consciente cu e hermentnan ta bon pa trabao di “nivel abao” manera proefwerk di multiple choice pero ta menos efectivo ora cu mester pensa mas y tin mas consideracion. Tambe mester tin un manera pa studiantenan alerta docentenan ora cu e puntuacion ta demasiado estricto of inconsistente, y e puntuacion final mester keda den man di e docente, el a splica.
Alrededor di 8 den cada 10 docente cu ta usa herment di AI ta bisa cu esaki ta spaar tempo den tareanan manera traha werkboek, huiswerk, proefwerk of trabao administrativo. Y 6 den 10 docente cu ta usa hermentnan di AI ta bisa cu esaki ta mehorando e calidad di nan trabao ora ta trata modifica e material di studiantenan of duna feedback.
“AI a transforma con mi ta duna les. Tambe el a transforma mi fin di siman y a duna’mi un miho balans enter bida y trabao,” Mary McCarthy, un docente di scol secundario y estudionan social na Houston cu a usa hermentnan di AI a splica tocante plannan di les y otro tareanan.
McCarthy a bisa cu e training cu el a ricibi for di su districto riba hermentnan di AI a yud’e modela uso apropia pa su studiantenan. “Bo ta tende ‘AI ta malo y muchanan ta bay bira menos sabi,” wel si pero si nos no siña nan con pa usa e herment,” McCarthy a comenta, “E ta sinti manera e ta mi responsabilidad como e adulto den klas pa yuda nan saca afo con pa nabega e futuro aki.”
Docentenan ta bisa cu e tecnologia ta miho si usa esaki moderadamente
Punto di bista riba e rol di inteligencia artificial den educacion a cambia dramaticamente desde cu ChatGPT a lansa den fin di 2022. Scolnan cerca di e pais inicialmente a prohibi esaki, sinembargo desde e tempo aki varios a busca manera di incorpora esaki den klasnan.
Preocupacion tocante sobreuso den studiante te ainda ta presente. Alrededor di mita di docentenan ta preocupa cu e uso di studiante di AI lo disminui e studiantenan su habilidad di pensa criticamente y di manera independiente of di tin persistencia ora di resolve problema, segun e estudio.
Un beneficio cu e docentenan ta mira den bira familiar cu inteligencia artificial ta e habilidad di por mira ora cu studiantenan ta haciendo uso dimas di esaki.
Pistanan cu tareanan ta skirbi pa herment di AI ta inclui un ausencia di eror den gramatica y frasenan compleho ora di skirbi, segun docente di Ingles Darren Barkett. El a bisa cu e ta depende riba ChatGPT su mes pa crea plannan di les y duna puntuacion riba proefwerk di multiple choice y verslag.
Den Chicago, docente di arte Lindsay Johnson a bisa cu e ta haci uso di programanan di AI veta pa su scol y considera safe pa usa cu menornan di edad, pa privacidad di data y otro preocupacionnan. Pa garantisa cu studiantenan ta sinti confia den nan habilidadnan, e ta bisa cu e ta introduci e tecnologia den etapanan mas laat pa proyectonan.
Pa su evaluacion final, Johnson a pidi e docentenan haci un pintura di un persona cu influencia den nan bida. Despues cu studiantenan pone e toque final na e cara di e suheto, Johnson ta introduci AI generativo pa esnan cu kier ayudo den diseña e background. El a usa un herment di AI dentro di Canva, despues di confirma cu su districto su departamento di IT cu e diseño di e programa a pasa e screening di privacidad.
“Como docente di arte mi meta ta pa nan sa e diferente hermentnan cu tin y pa siña nan con e hermentnan aki ta traha,” el a bisa. Algun studiante no tabata interesa den e ayudo. “Mita di e klas a bisa ‘mi tin un vision y mi ta bay traha riba dje.”
