(AP) – Ora director ehecutivo di Nvidia, Jensen Huang, a revela diabierna pasa cu e empresa ta traha hunto cu administracion Trump riba un tipo nobo di chip di computer diseña pa benta na China, esaki a marca e capitulo mas recien den un debate largo tocante con Merca mester competi cu e ambicionnan tecnologico di China.

E rasonamento a cambia na algun momento – cu funcionarionan Mericano citando seguridad nacional, derechonan humano of competencia puramente economico – pero e herment a keda mescos: control di exportacion, of e menasa di esaki.

Nvidia ta kere cu eventualmente por haya $50 biyon for di benta di chip di inteligencia artificial na China. Pero te awor restriccionnan imponi pa e administracion di presidente Joe Biden y despues reenforsa pa presidente Donald Trump a tene nan atras prome cu nan a negocia un acuerdo di intercambio.

Con control di exportacion di chip a cuminsa?

China tin su propio fabricanan di chip, pero historicamente nan a surti solamente procesador di calidad inferior, usa den auto y aparato. Cuminsando na 2014, gobierno di China a purba cambia esaki cu un “Fondo Grandi” nobo cu a inverti un cantidad grandi di placa den centenares di empresa di semiconductor.

Alabes, gobierno Mericano, desde prome periodo di Trump, a cuminsa corta acceso di China na un variedad creciente di herment pa haci chip pa server di computer, inteligencia artificial y otro aplicacionnan avansa.

China tabata particularmente molestia ora a blokea nan di cumpra un mashin disponibel solamente na un empresa Hulandes, ASML, cu ta usa luz ultravioleta pa graba circuito den chip di silicon. E restriccionnan a atrasa e esfuersonan di China pa haci transistor mas lihe y eficiente door di paketa nan mas cerca di otro.

Gigante di telecomunicacion di China, Huawei, a bira e cara publico di e tension comercial, cu alegacionnan Mericano cu nan producto por ser usa pa spionahe pa un lucha mas amplio pa dominio economico y tecnologico.

“Nos no kier nan ekipo na Merca pasobra nan ta spiona nos,” Trump a declara na 2020 mientras su administracion tabata reforsa restriccion pa blokea Huawei di haya acceso na tecnologia di chip, na mesun momento cu e tabata menasa di prohibi TikTok pa motibonan similar.

Biden a haci e restriccionnan di chip mas estricto

Presidente Joe Biden a mantene e restriccionnan despues di asumi oficina na 2021, pero tambe a intensifica nan cu un serie di control di exportacion cu a blokea e transport na China di e chip y aparato di fabrica mas avansa di mundo.

Esaki a afecta e benta na China pa e fabricante di chip di California, Nvidia, e diseñador principal di e chipnan specialisa cu ta necesario pa tecnologia di inteligencia artificial.

Despues cu e prome restriccionnan a drenta na vigor na 2022, blokeando chip incluyendo e H100 di Nvidia, e empresa a diseña un tipo nobo di chip cu no tabata mucho avansa pa yega na e punto pa restriccion.

Administracion di Biden a intensifica su restriccionnan na 2023 pa blokea e chipnan mas nobo. Anto Nvidia a lansa atrobe un tipo nobo di chip cu por a drenta China: e H20.

Trump su cambio di curso riba e H20

Administracion di Trump na april a stop e benta di H20 y otro chip avansa di computer pa China door di preocupacionnan di seguridad nacional, pero Nvidia y AMD a revela na juli cu Washington lo permiti atrobe e benta di chip, cu ta ser usa den desaroyo di AI.

Despues di haya un golpi financiero di $4.5 biyon durante e periodo di februari-april, Nvidia a calcula cu e medida di restriccion di exportacion na China lo costa e empresa $8 biyon mas den benta potencial desde mei te juli.

E oportunidadnan perdi a alimenta e esfuersonan di Huang pa persuadi Trump y otro funcionarionan di administracion cu e restriccionnan lo haci mas daño cu bon pa Merca.

“E pregunta no ta si China lo tin AI, nan ya tin esey,” Huang a bisa analistanan durante un conferencia via yamada fin di mei. “E pregunta ta si un di e mercadonan di AI mas grandi di mundo lo funciona riba plataformanan Mericano. Proteha fabricantenan di chip di China for di competencia Mericano ta fortalece nan na exterior y debilita e posicion di Merca.”

Nvidia y AMD tambe a concorda na augustus pa comparti 15% di nan entrada for di benta di chip na China cu e gobierno Mericano, como parti di un acuerdo pa sigura licencia di exportacion pa e semiconductornan.