Siguridad di cuminda ya no ta un escogencia sino un necesidad. Esey ta e mensahe cu a sali afo di e di dos reunion di Dutch Caribbean Agriculture, Livestock and Fisheries Alliance, DCALFA. E encuentro a tuma luga na Boneiro algun tempo pasa, unda como 50 representantenan di tur e organisacionnan encarga cu agricultura, cria y pesca di e paisnan den Caribe Hulandes y tambe di Hulanda, a reuni pa discuti e tema ‘Bridging Islands-Cultivating Growth’- Conecta Isla -Cultiva Crecemento.

E evento a enfoca riba fortificacion di colaboracion regional pa siguridad di cuminda, resiliencia economico y desaroyo sostenibel den e sector primario. E obhetivonan strategico di e conferencia ta inclui reduccion di dependencia riba importacion, fomenta comercio entre e islanan, implementa sistema unifica di data, ademas di integra sostenibilidad y innovacion den sistemanan di cuminda.

Un tema central durante ‘Conecta Isla-Cultiva Crecemento’ tabata pa eleva productornan local, manera agricultornan, criadonan di bestia, piscado y hobennan, como agentenan di cambio. E sesionnan a enfatisa e frustracion y aspiracionnan di trahadonan di sector primario, cu yamadonan pa reforma di maneho, condicionnan di mercado husto, educacion y inclusion directo den e proceso di decision. Hobennan tabata pidi pa entrenamento basa riba integracion cu tecnologia y opcionnan di carera hopi cla den agricultura moderno.

A discuti siguridad di cuminda, ademas di e financiamento cu ta esencial pa yega na esaki. Participantenan na e conferencia a reconoce cu e aspecto aki ta uno sistemico, cu ta rekeri acercamento holistico. Por ehempel, e ta nifica revisa derechonan riba tereno, adaptacion climatico, logistica y hasta cambio di forma di come.

Gobierno di Hulanda a aloca 24 miyon euro den un fondo di siguridad di cuminda, cu mester sostene infrastructura, preparacion y acceso na prestamonan barata. Pero preocupacionnan riba ‘equity,’ esta propiedad di balor, inclusion den e sistema di pesca y habilidad pa yega na fondo/subsidio ta enfatisa e necesidad pa implementacion cu ta tene cuenta cu e situacion local.

Colaboracion regional y internacional
E gabinete di Enviado Special di Hulanda a presenta oportunidadnan pa financiamento y desaroyo di proyecto bou capa di Union Europeo. Ya caba tin proyectonan andando na Boneiro, cu ta ilustra modelonan demostrativo cu ta innovativo y cu facilmente por amplia den agricultura digital y uso circular di recursonan. Ta trata di e proyectonan PHITO, cu ta un aplicacion dirigi na innovacion y conscientisacion di sistemanan di cuminda, cu ta brinda agricultura digital y conseho di mercado, conectando agricultornan y consumidornan. E app ta activo na Boneiro.

Otro ta BonCirc, cu ta Sustainable and Circular Organic Waste and Sargassum Management, cu ta enfoca riba maneho sostenibel di fluhonan di sushedad organico. Ta investigando con por haci uso di e resto organico pa e forma parti di economia circular na Boneiro.

Ademas, Boneiro tin e proyecto di monitorea pesca cu ta enfatisa e importancia di e papel di data den afirmacion di derechonan internacional di pesca y sostenibilidad. Harmonisacion comercial y di maneho riba bareranan internacional, tanto logisticamente, legal y fiscal tabata un punto cu participantenan a keda señala durante e conferencia. A puntra particularmente pa acuerdonan entre islanan. Un aspecto ta proceduranan di duane simplifica y proteccion di prijs, a ilustra. Mes crucial ta implementacion di standard pa siguridad harmonisa pa calidad di cuminda y strategianan pa mercadeo regional.

Innovacion local y inspiracion
Durante e encuentro na Boneiro, participantenan por a observa iniciativanan di impacto halto, manera agri-turismo, reforestacion sostenibel y cadenanan di balor artisanal. Door di experiencia e actividadnan aki a demostra cu viabilidad economico y cuido ecologico por bay man den man cu resiliencia di comunidad y preservacion di e rikesa cultural.

Siguiente pasonan
Na final, participantenan conclui cu mester bin un union fuerte entre e paisnan Caribense Hulandes, pa sigura cu ta pone den practica locual a palabra. E siguiente paso awor ta pa yega na e fortificacion formal di DCALFA como e organo cu mester coordina e trabounan aki. Es mas, e organisacion awor ta encarga pa ehecuta e compromiso pa finalisa e cuadro regional di data y informacion, percura cu ta continua cu e proyectonan piloto di comercio inter-insular y formalisa e status legal di DCALFA, pa asina logra yega na fondonan internacional ademas di por tin mas influencia den maneho. Particularmente pasobra manera un di e participantenan a mustra, ya cu “siguridad di cuminda no ta un escogencia, sino uno necesidad.” Pa tal motibo mes, ta pa medio di accion comparti, DCALFA por traha e caminda pa un Caribe Hulandes cu ta mas autonomo y resiliente.

Presidente di DCALFA, Natalie Maduro di Santa Rosa, a bisa cu ora reunionnan asina ta fomenta crecemento ya cu ta comparti conocemento y ta stimula otro. No solamente a lansa e website di DCALFA, pero mes importante, a re-imagina un maneho di pesca nobo, mientras cu a enfoca tambe riba e tema di financiamento di siguridad di cuminda y alabes, tende di e perspectiva di hobennan activo den agricultura, cria y pesca.

“Nos a profundisa nos determinacion colectivo. Ya nos no ta papia si dependencia propio na nivel di region ta posibel, sino awor ta mira con hunto por yega na esey. Como Presidente di DCALFA mi a mira un confianza creciente riba nos islanan, unda ta kere den nos mesun habilidad pa innova localmente, pa comercialisa e sector na nivel regional y tambe pa eherce influencia internacional.” Segun Maduro, e organisacion ta mas cu un plataforma, e ta un vehiculo cu ta maneha pa unidad pero ancra den accion. “Sinembargo, e ta rekeri si liderazgo continuo, alinea maneho y inversion. E ta rekeri confianza entre Gobiernonan y productornan, entre generacionnan y entre e islanan mes.” Maduro a agrega cu mester sigui scucha di esnan cu ta produci den e sector, no pa djis aplaudi nan , pero netamente pa por sobrevivi y sigura autonomia.