Parkietenbos (LC) (2).JPG
Sra. Leslie Escobar, kende ta hurista di DESPA, a indica na Bon Dia Aruba cu a base di un keho di un habitante di e bario di Parkietenbos cu a yega na su departamento, nan a cuminsa tuma accion. Nan a bishita e area di Parkietenbos pa asina nan por haci nan propio investigacion pa mira kico ta pasando den e bario.
 
E bario aki ta un area habita pa basta ciudadano. Despa a yega na e conclusion cu nada particular ta pasando na Parkietenbos. Tambe nan a bishita e dump, y aki nan a constata cu tin sushi ta wordo kima banda di lama y cu e biento ta hiba e huma den direccion di lama, pero no den direccion di e habitante nan. “Segun e habitantenan di e bario di Parkietenbos, no ta tur ora tin molester di e holo di huma. Nan ta sinti esaki mas tanto riba dianan cu biento cay of cambia di direccion so,” Sra. Escobar a indica.
 
Investigacion
Basa riba e investigacion cu a wordo haci, nan a traha un conseho pa nan director. Segun Sra. Escobar, nan ta bisa cu ta importante pa e instancianan concerni sinta hunto, esta Directie Natuur en Milieu, Brandweer, Polis, Departamento di Salubridad Publico, pa mira con por bay over na un investigacion di e aire den e bario. Asina aki por constata si tin tension di gas nan toxico. Sra. Escobar a indica cu basa riba midimento y resultado di laboratorio, nan lo purba haya sa si tin gasnan toxico. Y si nan haya gasnan toxico, lo investiga ki tipo di gasnan toxico lo tin. Na momento cu tin e resultadonan aki, Departamento di Salubridad Publico lo por bay over na wak ki relacion esaki por tin cu e salud di e habitantenan di Parkietenbos.
 
Keho entrega na DESPA
“Esaki ta e unico keho cu a yega na mi departamento y cu a wordo treci na mi atencion,” el a sigui bisa Bon Dia Aruba. Den pasado nan a yega di ricibi keho for di trahadonan di Arugas. Nan a keha riba e compania di Eco Gas, unda cu nan a indica cu e compania tabata emiti holonan hopi fuerte.
 
Tin solucion pa e problema?
“Nos ta purbando mas miho cu nos por pa busca un solucion pa e problema, pero mester tene cuenta cu tin biaha nos man por ta mara,” el a comenta. Esaki ta trece cu ne cierto limitacion y no ta tur ora por logra tur locual nan kier. “Nos no por bay over asina facil na cera un instancia of compania asina grandi sin cu ley duna permiso,” segun Sra. Escobar. Nan ta un estado di derecho kiermen nan ta haya nan mes tin cu actua responsablemente y conforme cu e autoridad cu ley ta duna pa haci uzo di derecho.

LEAVE A REPLY

Please enter your comment!
Please enter your name here