Ayera Corte Comun di Husticia (Hof) a dicta sentencia den e caso penal contra sospechoso G.F.B., ex-minister Plenipotenciario di Aruba na Hulanda. E caso aki, conoci como Tulipan, ta trata di malversacion di fondonan publico y abuso di funcion durante e periodo di 2017-2022 na Arubahuis.

Caso Tulipan

Na juni, Corte den Prome Instancia di Aruba a dicta sentencia den e caso penal Tulipan, den cual ex-minister Besaril y ex-director interino di Arubahuis, Glenn Ling tabata acusa di malversacion di casi 200 mil florin y abuso di nan posicion como ambtenaar. Ambos a keda condena.

Caso penal Tulipan ta regarda iregularidadnan financiero den Arubahuis durante tempo cu Besaril tabata fungi como Minister Plenipotenciario y Glenn Ling como director interino.

Segun corte, di e investigacion a keda proba cu ex-minister Plenipotenciario Besaril a malversa placa door di laga Arubahuis paga pa e gastonan di uso di telefon priva, di vivienda y biahenan priva.

Ademas Besaril a haci uso di e carchi di banco di Arubahuis pa cubri gastonan personal y priva pa haci compras y come na restaurant. Tambe el a contrata un compania pa servicio di PR, cu ta pertenece na un conoci di dje, mientras cu Arubahuis tabatin un departamento di PR caba.

Hues a remarca cu Besaril, cu su actonan, a afecta e integridad di un instancia manera esun di Arubahuis y a enfatisa cu na momento di haci uso di placa di pais Aruba, e placa mester ser usa pa loke e tabata ser destina y no pa algo otro cu no ta relaciona cu su funcion y cu na final dia lo a duna un beneficio personal.

Manera ta conoci, e caso tabata consisti di cinco zaakdossier y durante e uitspraak, hues a pasa riba e resultado di cada zaakdossier.

Pa loke ta e zaakdossier di Comunicacion (Communicatie), hues a splica cu a keda proba cu en berdad Besaril a laga Arubahuis paga pa recibonan di Setar di cable TV y internet registra na un adres priva.

 

Den e zaakdossier di Vivienda (Huurwoning) hues a splica cu gobierno a duna Besaril permiso pa usa e cas y pais Aruba a cubri un parti di e gastonan relaciona na e renobacion y mueblacion di e cas cu e ex minister Plenipotenciario a huur. Pa e punto aki el a haya vrijspraak.

Pa loke ta trata e resto di e gastonan cu a ser realisa relaciona na vivienda, cual ta inclui entre otro instalacion di un sistema di alarma, Besaril a ser haya culpabel di malversacion di 72 mil florin.

Den e zaakdossier di Dunamento di Servicio (Dienstverlening), hues a splica cu Besaril a usa placa di Arubahuis pa paga compania di PR, cu ta pertenece na un persona conoci di dje, pa servicio di PR; mientras cu Arubahuis mes tin un departamento di PR.

Pa loke ta e zaakdossier di su Estadia na Aruba (Verblijf Aruba), esaki ta relaciona cu e vakantie cu Besaril a tuma pa Aruba cu a cuminsa manera un vakantie personal, cu despues, segun Besaril, a converti den un biahe di trabao.

Hues a splica cu di e investigacion a keda proba cu Besaril a haci uso di placa di Arubahuis pa paga pa gastonan priva y pa beneficio personal. E suma cu hues a indica cu Besaril a malversa den e zaakdossier aki ta cinco mil florin.

Besaril a haya vrijspraak pa un punto di e zaakdossier aki, cual tabata e uso di e servicio di VIP, cual ta permiti pa ministernan haci uso di dje.

Den e zaakdossier di Uso di Debit Card di Arubahuis (Pin Betaling), hues a splica cu corte a haya cu den gran parti Besaril a haci uso di e carchi pa paga gastonan personal y priva y pa su propio beneficio. Hues a indica cu e suma malversa den e zaakdossier aki ta 47 mil florin.

Hues a splica cu Besaril a beneficia personalmente di e uso di fondonan di pais Aruba y Arubahuis. El a remarca cu el a laga Arubahuis paga pa su propio beneficio, pa cosnan priva y a mal usa su funcion y a mancha e integridad di Arubahuis.

Ademas el a subraya cu Besaril no parce di reconoce e seriedad di su actonan y tabata punta dede riba otronan.

Pa loke ta su condenacion, hues a splica cu a tene cuenta cu e puntonan pa cual el a haya vrijspraak y e hecho cu e no tin antecedente cu husticia, a dun’e un castigo mas abao di locual fiscal a exigi inicialmente.

Hues a condena ex minister Plenipotenciario Besaril cu 20 luna di prison, di cual 10 luna ta condicional y tres aña di prueba, kitando loke el a sinta caba den KIA.

Pa loke ta e caso di expropiacion, hues a indica cu Besaril mester paga mas di 138 mil florin y si no paga esaki, e lo ricibi un castigo di un aña di prison.

Apelacion

Segun Ministerio Publico a informa den un comunicado di prensa, abogado di ex-minister Besaril a entama apelacion dia 30 di juni 2025. Sinembargo, ayera Corte a rechasa e apelacion.

E abogado a informa anteriormente dia 27 di juni 2025, mediante un e-mail pa griffie y Ministerio Publico cu e sospechoso kier bay den apelacion. E e-mail aki a wordo ricibi 5:18 pm.

E punto di bista di Ministerio Publico durante e tratamento di e apelacion entama ta cu como cu e sentencia a ser dicta dia 13 di juni 2025 contra G.F.B. “op tegenspraak”, e sospechoso mester a apela no mas laat cu 27 di juni 2025. Segun hurisprudencia constante di Corte Supremo, un recurso legal ta considera den termino di apelacion solamente si e ta entrega den ora di trabao di e griffie. Segun website di Corte, e griffie ta cera 4:00pm. Pues griffie tabata cera caba 5:18pm. P’esey e apelacion ta ser considera di ta entama e siguiente dia di trabao. Esey no ta den e termino den cual e apelacion por a ser entama.

Ayera mainta Hof a dicta sentencia conforme e punto di bista di Ministerio Publico y a declara e apelacion di G.F.B. no admisibel. Cu esaki e sentencia di 13 di juni 2025 ta ireversible.