E tiramento fatal di 3 nabegante Mericano na un instalacion di ehercito marino den December lo por cende bek e conflicto tumando luga pa basta tempo entre gobierno federal Mericano y companianan di tecnologia tocante privacidad di datonan y encryption.

Como parti di e investigacion den e incidente violento, cual ta wordo categorisa como un acto terorista pa gobierno, Departamento di Husticia ta insisti cu e investigadonan mester di acceso na datonan di dos iPhone cu ta locked y ta encrypted, perteneciendo na e difunto atacado, un studiante di Aviacion Saudi. E problema ta cu Apple a diseña e iPhone cu tecnologia di encryption cu ta asina sigur cu e compania mes no por lesa e mensahenan priva riba cualkier iPhone.

E conflicto ta hisa dos pregunta grandi. E prome ta encera si Apple ta rekiri di yuda cualkier gobierno pa hack su propio siguridad ora ta pidi pa esaki. E di dos, si gobierno pone presion riba e problema aki lo ta e prome stap di prohibi tecnologia di encryption cu gobierno no por kibra.

Departamento di Husticia y Apple ta combersando ultimamente tocante e studiante Saudi su iPhone. Oficialnan di e departamento ta conta cu nan no a ricibi un contesta tocante si Apple tin e capacidad pa unlock e telefonnan. Durante un conferencia di prensa dialuna ultimo, anunciando e descubrimentonan di e investigacion dene caso di Pensacola station, Procurador General Mericano William Barr a bisa cu e ta critico pa husticia sa cu ken e atacado a comunica y tocante kico, prome cu el a muri.

Ingenieria di ‘backdoor’ ta irealistico.
Actualmente husticia ta hayando dificultad pa haya evidencia den telefonnan despues cu varios compania di tecnologia a cuminsa ‘end-to-end encryption’, cual ta haci e data den telefonnan solamente lesabel pa e persona cu e mensahe ta destina pe, no tercer partidonan. Maske mayoria oficialnan di husticia no ta splica cla kico mester haci pa resolve e problemanan, expertonan di siguridad ta bisa cu autoridadnan ta basicamente puntrando pa un ‘backdoor’- un yabi secreto cu lo laga autoridadnan decifra e informacion encrypted cu un orden di corte.

Pero e mesun expertonan ta indica cu e tipo di backdoor aki den sistemanan di encryption lo haci nan insigur. E simpel echo cu un backdoor ta existi ta suficiente pa e mundo su spionnan y criminalnan discubri e yabinan matematico cu lo por unlock e encryption. Y ora esaki pasa, tur persona cu ta depende riba e encryption aki ta vulnerabel pa cualkier persona cu e yabi secreto.