prome (2).JPG

Manera a wordo informa cu dia 10 di october lo cuminsa tuma solicitud na e Citgo Desk mes. Segun gobierno mas cu 200 hende acudi. E proceso no a bay mucho bon na comienso. Otro cos: tin keho di hende cu aplica via e-mail momento cu e e-mail a habri varios luna pasa, pero te awor a keda sin contesta.

 

Di trempan den oranan di marduga (4:30 am) tabatin hende cu bay para warda na e Citgo Desk pa entrega nan solicitud, como cu nan tabata sa cu ta bay tin hopi hende. Sinembargo no tabatin hende pa atende nan na e Citgo desk.

 

Bon Dia Aruba tabata presente y a mira cu hendenan a bay puntra hasta na postkantoor kico tabata e problema. Un señora a comenta cu el a tuma contacto cu oficina di minister Mike de Meza, pero e persona cu a contesta a bisa cu nan lo tuma contacto bek. Pasobra nan mes no sa di e caso y cu ta minister Paul Croes di Labor lo ta esun encarga cu e parti di labor.

 

Hopi hende tambe a bay na e oficina di Departamento pa Progreso Laboral (DPL) na San Nicolas, pero eynan tambe nan a wordo manda bek, como cu na DPL tampoco no tabatin informacion tocante Citgo. Unico cu DPL tabatin ta e e-mail unda pa aplica pa Citgo.

 

Despues di basta rato cu e hendenan a cuminsa fada, dos representante di gobierno a yega banda di mas o menos 10or di mainta pa atende cu e personanan. Sinembargo nan no por a yuda nan  pasobra e oficina di Citgo Desk (oficina ex Doov) no tabata cla pa cuminsa funciona. E representantenan a opta pa bay cu tur e hendenan pa e oficina di DPL pa cuminsa tuma CV di e personanan cu tabata tin esaki nan man. Pero esunnan cu no tabata tin e CV a wordo bisa cu mester bin bek mañan cu nan CV.

 

Relato di gobierno

Ayera tardi Bon Dia Aruba a ricibi un relato di gobierno unda a indica cu a registra 225 hende interesa den un trabou na e refineria.

Den e relato nan tambe ta menciona e problema na comienso di dia. Francis Trimon di ministerio di Labor a duna di conoce cu ‘rapidamente’ a busca solucion dialuna mainta pa atende e grupo grandi di persona cu a bin pa registra na Citgo Desk. E oficina cu ta  situa patras di postkantoor San Nicolas lo mester a habri, pero pa motibo di tempo  malo e edificio no tabata den condicion pa ricibi hende. E yobidanan fuerte di ultimo simannan a empeora e condicion di e dak y, aunke ta trahando duro riba dje, no keda cla na tempo pa habri pa publico, segun sr. Trimon.

 

Janiro Eisden ta un arbeidsconsulent di ministerio di Labor y ta forma parti di e Citgo Desk for di su inicio, tres luna pasa. Segun e relato di e ministerio, Eisden tambe a atende ciudadanonan cu a yega dialuna mainta pa registra. A pesar di e inconveniente cu edificio, e ta bisa cu esaki a bay bon. “A bay hopi bon mes. Hendenan ta contento y tin speransa bek; nan ta cla pa bay traha.”

 

Citgo Desk lo keda na edificio DPL situa pabou di RBC San Nicolas te ora cu e edificio di ex DOOV ta cla.

Proceso di registracion

Sr. Eisden ta splica e proceso di registracion: “E manera mas facil ta pa bin cu cedula di identidad y CV, diplomanan cu por saca copia. Mas papel cu ta mustra bo capacidad, ta mas facil pa drenta refineria.” Registracion ta bay continua tur dia di siman, entre 8or di mainta y 12or di merdia y di 1or pa 3or di atardi. “Ta ricibi tur hende cu bin pa hinca nan riba e lista pa tin e data base completo y pas’e pa Citgo.”