(NLTimes) – Uso di go-cart pa duna tour di Amsterdam mester ta prohibi, Consehal Melanie van der Horst a bisa. E consehal pa trafico, transporte y calidad di aire a responde na un informe di diamars di e emisora local AT5 tocante un compania na Osdorp cu a cuminsa haci tour di go-cart e siman aki. E go-cartnan ta core den centro di ciudad di Amsterdam.
“Nos sigur no ta na fabor di tin e tipo di vehiculonan aki den nos ciudad. Mi ta hopi preocupa pa e siguridad di trafico si hende cuminsa usa esaki pa core den cayanan di Amsterdam cu ya ta druk,” Van der Horst a declara.
E compania cu ta ofrece e tour yama Molly’s cart. E ta un parti di e sala di arcade estilo Hapones, Molly’s, na Osdorp. E concepto di core go-cart door di e ciudad a resulta popular na Tokio, Hapon.
Pero Van der Horst ta kere cu e “tour loco” no ta pertenece den trafico debi na e asunto di siguridad conecta cune. “Bo tin visibilidad limita den e tipo di vehiculonan abou aki, y bo no por ser mira facilmente pa un truck, tram of auto.”
E consehal ta bay pidi e alcalde pa altera e reglanan pa e go-cartnan no por core den ciudad druk. Te na e momento aki, e gemeente di Amsterdam ta bay wak varios opcion pa tene e go-cartnan pafor di e ciudad.
Miembro di conseho di Ciudad di Volt Juliet Broersen tambe tabata critico di e idea. El a bisa AT5 cu turismo masal ta un di e asuntonan mas grandi cu Amsterdam ta confrontando actualmente, y cu esaki ta parcialmente causa pa loke e ta describi como e “parkificacion di diberticion” di e ciudad.
“Esaki ta similar cu bicicleta di cerbes y trahenan di penis y nos na Amsterdam no mester kier esey”.
