Diamars mainta, Departamento di Salubridad Publico (DVG) a convoca un conferencia di prensa pa trece mas informacion corecto na comunidad tocante e Novel Coronavirus (2019-nCoV), detecta inicialmente na China y cu aworaki varios caso sospechoso a registra den varios pais di mundo.

Nan ta considera importante pa suministra informacion pa asina nos comunidad por ta bon prepara pa atende cu cualkier eventualidad. Consehero medico di DVG, microbiologo Wilmer Salazar a splica riba e Novel Coronavirus, pasobra e ta sinti cu aworaki ta presentando e mesun fenomeno, ora cu a presenta otro virus den pasado manera e H1N1, cu e mesun capacidad di complicacion mortal.

Novel Coronavirus.
E Novel Coronavirus a a wordo descubri na Wuhan (China) y actualmente a expande den e pais Asiatico aki; y tambe den otro paisnan. “E ta creando un situacion cu nos mester ta atento riba esey,” el a bisa, E no ta descarta cu e virus aki lo por converti tambe den un epidemia of pandemia cu lo bay afecta basta hende rond mundo.

Coronavirus ta un virus cu su habitat den animalnan. Pero ora cu e virus ta cambia su structura, e por bay di un animal pa otro, y yega te ser humano. Unabes cu e virus ta adapta na ser humano e por plama ocasiona un brote cu por culmina den un epidemia, un pandemia, entre otro.

Segun Salazar den ser humano ta wordo presenta tres virus actualmente. E prome ta Coronavirus cu ta produci griep. Mayoria di biaha 30% di e poblacion ta resulta afecta pa esaki, specialmente mucha. E ta un malesa cu su sintomanan ta ‘suave’ cu ta keda afecta aparato respiratorio superior: nanishi, boca y garganta.

E otro dos virus antes tabata habitat den animal tambe ta un Coronavirus. Pero e virus aki a jump di bestia pa humano. E ta SARS (Severe Acute Respiratory Syndrome) cu ta un virus cu ta ocasiona hopi daño: Infeccion di pulmon severo y morto. E virus aki a causa 8.700 caso confirma y casi 800 morto na aña 2009.

Despues a bin e virus MERS COV (Middle East respiratory syndrome) cu tambe a haya atencion mundial pasobra e tabata hopi mortal. Pero despues di un tempo, e dos virus aki a keda limita.

 

Actualmente nos a conoce un virus nobo. P’esey nan ta yam’e como Novel Coronavirus, cu aparentemente a bin for di animalnan. Segun Salazar, ainda no ta conoci cual animal ta, ya cu esaki ta bou investigacion. Pero e virus aki su sintomanan ta pisa cu te hasta e por causa morto.

E sintomanan generalmente ta cuminsa como un griep, keintura, dolor di cabes, tos seco, nanishi ta core y dolor di curpa. Pero e por tin complicacion, esaki ta depende di e situacion di e persona, ya cu e por haya neumonia, infeccion di pulmon, problema cu riñon y te hasta demas organo di curpa por haya complicacion general. Tur esakinan lo por ocasiona morto.

Tanten Organisacion Mundial di Salud (WHO) riba su website a informa cu ayera tabatin un reunion plania na Ginebra, caminda a base di e Reglamento Sanitario Internacional (RSI 2005) a wordo convoca e Comite di Emergencia di e organismo mundial aki.

Den dje e Comite di Emergencia lo asesora director general di WHO, Dr. Tedros Adhanom Ghebreyesus pa evalua si na e nivel aki e brote di e 2019-nCoV ta nifica un emergencia pa salud publico di preocupacion internacional (PHEIC), y kico lo ta e recomendacionnan cu mester implementa pa maneha e situacion aki.