Ayera Corte di Casacion (Hoge Raad) a trata e caso di ex-minister Benny Sevinger. Abogado General (AG) na Hulanda a indica cu su conseho pa Hoge Raad lo ser presenta dia 27 di januari 2026. Despues di e conseho aki, Hoge Raad lo stipula un fecha pa dicta su sentencia, cu lo representa e veredicto definitivo den e caso.
Normalmente, Hoge Raad ta sigui e recomendacion di Abogado General. P’esey, e conseho di e AG lo duna un indicacion cla di kico por spera Sevinger den 2026. Si a sentencia anterior keda confirma, e ex-minister lo tin cu cumpli e castigo di prizon cu a ser estableci.
E ultimo veredicto substantivo den caso “Avestruz” a tuma luga den juli 2024, ora cu Hof a aumenta e castigo Benny Sevinger na 36 luna di prizon adicional. Esaki tabata un aumento significante compara cu e veredicto di e Corte di Prome Instancia.
Hof a yega na e conclusion cu, den su capacidad di minister, Sevinger a abusa di su poder y a pone su posicion na servicio di interes personal. Segun e sentencia, el a ser “cumpra”, algo cu Hof a cualifica manera inaceptabel y dañino pa confiansa publico.
Prome cu esaki, un hues di Corte di Prome Instancia a haya Sevinger solamente culpabel di malversa fondo di un fundacion di campaña. Pero e investigacion y e apelacion a cubri un escala mas amplio di acto delictivo.
Segun e sentencia di Hof, Sevinger tabata acepta trabou y beneficio personal; a malversa mas cu Afl. 11.000 di un fundacion relaciona cu su campaña politico, cu despues a ser usa pa un biahe personal; y abusa di poder y traiciona confiansa di e comunidad.
Su castigo final a keda fiha na 48 luna di prison, cu 12 luna condicional y un periodo di prueba di tres aña. Ademas, e ta prohibi pa ser eligi of traha como ambtenaar pa cinco aña.
Hof a laga cla cu e comportacion atribui na Sevinger ta un atentado directo contra integridad gubernamental. Den un momento caminda confiansa publico den politica ta fragil caba, e sentencia a busca reafirma cu abuso di poder no por bay sin consecuencia.
