Pic2 Trafico.JPG
Mescos cu tur aña segun mayor Alex Pieters di Unidad di Motor, Polis ta bay pusha cu control mas extra den temporada di dianan di fiesta y fin di aña en cuanto ta trafico. Mirando cu ta bay tin diferente fiesta di compania y otro eventonan, polis ta bon na altura cu e luna di december ta conoci pa tin hopi trafico unda por spera accidentnan den oranan laat di anochi.
 
Segun sr. Pieters, locual experiencia ta duna ta net e dos pa tres dianan prome cu Pasco como tambe e dos pa tres dianan prome cu fin di aña ta e dianan di mas druk. Te ainda hopi biaha riba e dianan mes di fiesta ta hopi trankil unda locual nan por a mira aña pasa tambe ta cu hopi hende toch ta na cas riba e dianan aki. Si bo ta un persona cu no tin pasenshi riba caminda bo mester percura pa bo tuma rutanan alternativo pa bo no bay pega den e trafico aki anto pone cu despues bo bay haci un movecion cu por causa accident, segun sr. Pieters.
“Trafico ta un actividad riba su mes caba. Pa e motibo aki ora bo ta forma parti di trafico, bo mester percura pa concentra y pone atencion pa por anticipa otro trafico. Den e luna aki bo ta haya hopi hende cu ta distrai hopi lihe manera riba compranan cu mester wordo haci prome e luganan cera te cu documentonan importante pa cumpli y yen otro cos.” E ta splica cu pa motibo cu den e temporada aki bo ta haya hopi hende ta den pura pa purba di regla nan asuntonan, bo ta haya e accidentnan ta cuminsa subi pasobra e atencion no ta na e trafico mas.
 
Caminda kibra
Ultimo tempo Polis ta ripara cu hopi hende ta kehando di dje, ta cu tin yen buraco den varios caminda door di e asfalt cu ta kibra anto ora esakinan yena cu awa bo no ta wak unda nan ta. “Baha bo velocidad y pasa trankilo pa si mester tin un buraco eynan pa bo no kap bo tairanan. Esaki no ta cos cu DOW por drecha di awe pa mañan pues tene cuenta cu esey como tambe e hendenan y casnan cu ta hopi cerca di plasnan di awa. Tene cuenta cu otro pa no haci cos pa malo cu despues ta causa daño na otro hende.”
 
 
Bebe alcohol rond di supermercado
E areanan di supermarket como tambe areanan di tiendanan y restaurantnan ta luganan cu polis lo tin extra bista riba nan como tambe naturalmente e fiestanan y unda ta bay tin mas movecion. “Polis ta bay percura pa ta den e areanan aki den forma preventivo tambe pa purba di slow down e trafico anto mustra hende cu polis t’ey riba caya pa asina tene mas na cuenta,” sr. Pieters ta bisa. Si bo ta bay ta bebiendo alcohol, Polis ta recomenda pa corda pasa e yabi pa un otro chauffeur of busca un solucion pa bo no mester resulta di bay core bao di influencia. “No tuma riesgonan pasobra no por ta cu abo ta bay haci un fout, pero door di e alcohol e ta bay pone cu bo no ta bay tene cuenta cu otro trafico. Tin otro hende tambe por haci fout anto si otro persona haci fout y abo ta bao di influencia, bo ta core e riesgo pa tambe wordo deteni. Esaki ta pasobra bo djis no ta permiti pa core auto bao influencia di alcohol.”
 
 
 
Prohibicion di core
No ta importa e vehiculo cu bo ta coriendo, si Polis haya bo bao influencia, bo ta wordo deteni.
“Nos por bay cu bo vehiculo. Si tur bo papelnan ta na ordo pero bo no tin niun otro hende pa bay cu bo vehiculo na e momento ey pa pone bek na cas, e ora nos ta takel e vehiculo y bay cu esaki.” Si por ehempel bo no tin bo rijbewijs cu bo na e momento ey, Polis por takel e vehiculo anto keda cu ne den nan poder te ora bo bin mustra bo rijbewijs. Esaki ta depende si bo ta bao influencia y cuanto bo a supla pasobra si Polis confisca bo rijbewijs e ta bira un tiki fastioso. Pues e ora ey un otro persona lo por bin saca bo auto si tur papel ta na ordo pero abo como doño mes no lo por bay core despues pasobra den dianan di fiesta bo lo wordo prohibi pa core si bo rijbewijs wordo confisca. Si haya bo toch ta core despues, esaki ta bira un delito y polis por detene bo mesora.

LEAVE A REPLY

Please enter your comment!
Please enter your name here