“Pa e dia ta un exito, nos ta pidi partidonan pa colabora cu e Conseho Supremo Electoral y autoridad policial. Si cada partido dicidi cu nan mes ta haci kico nan kier, basicamente nan ta tuma e responsabilidad di e Conseho Supremo Electoral y haci esaki di nan mes. Ta manera nos ta organisa un fiesta y esun cu bini ta trece su mes conhunto pasobra esaki ta mas na su antoho.”

Esaki ta e reaccion di Conseho Electoral ayera den un conferencia di prensa riba e preocupacion di polis pa e luga y tambe e discusion riba e orario di entregamento di e listanan di e 10 partido politico participante na eleccion. Pa cu e ultimo AVP kier entrega nan lista riba e mesun orario cu e Conseho a planea pa e partido Raiz.

Den e rueda di prensa presidente Glenn Thode y vice-presidente Hubert Maduro, miembro Manolo Giel, y Sharine Luidens (Censo) tabata presente. Riba diferente pregunta di prensa e representantenan di e Conseho a elabora mas riba e situacion cu por surgi dia 4 di augustus ora e partidonan mester entrega nan lista cu candidatonan. Pa loke ta e aspecto di siguridad, e Conseho a trece dilanti cu si 10 partido dicidi cu nan ta aparece pa entrega lista ora nan ta desea, ignorando e invitacion di e Conseho, cu tin como meta garantisa un curso ordena di e dia, anto tin problema grandi. E Conseho ta haya cu nan ta responsabel pa organisa e entrega ordena, pero cu nan no por ta responsabel pa loke ta tuma luga pafo di e edificio, entre e personanan cu ta acompaña e candidatonan. Ta p’esey tabatin e siguransa di autoridad policial cu nan lo sa maneha e situacion ey.

Riba kico por pasa concretamente dia di entrega, pa tres or di atardi, ora cu partido Raiz ta na turno pa entrega, a contesta cu no solamente Raiz lo tin preferencia, pero cu nan lo ser atendi sin mas na e ora ey. Ley ta prescribi cu tur partido tin te 4or di atardi pa nan registra. Di su banda e Conseho ta enfatisa cu nan ta organisa y structura e dia hustamente pa por atende tur partido, por igual y debidamente.

“Nos conseho ta responsabel pa e tareanan den ley, cu ta registra partidonan politico conforme e exigencianan di Ley y organisa eleccion conforme Ley. Ley ta duna Margen, y Conseho Supremo Electoral ta organisa den e margennan ey (articulo 16 Kiesverordening). Nos Conseho, den preparacion pa e entrega di lista dia 4 augustus binidero a sinta dia 21 di juli cu un delegacion di polis y den e reunion aki nos a considera tur e argumentonan cu a bin dilanti pa cua lo mester organisa e entrega di lista na un luga mas grandi cu Stadhuis.” 

Entregamento ta keda na Stadhuis
Pero diahuebs Conseho Supremo Electoral a ricibi un carta di parti di alto comisario di cuerpo policial, via prome ministro, cu e peticion pa reconsidera e luga pa tene e entrega di lista di candidato.

Conseho Electoral ta declara di tin confiansa den cuerpo policial, y ta mantene loke a palabra cu e autoridadnan policial presente den e reunion di 21 di juli cu Conseho Electoral. Nan decision tabata cu e entrega di lista lo tuma luga na Censo, despues di considera tur argumento cu tabatin pa tene e entrega di lista na otro sitio mas grandi cu Stadhuis. Di parti di esnan presente a haya e siguransa cu lo por maneha e situacion di orden publico riba dia di entrega.

Por lo tanto Conseho Supremo Electoral ta mantene su posicion cu e entrega ta tuma luga na Censo (Stadhuis) y cu responsabilidad pa orden publico pafo di Censo ta responsabilidad di autoridadnan encarga cu orden y siguridad publico.

Tambe e conseho ta enfatisa:” Un biaha mas, ta Conseho Supremo Electorial ta organisa, ordena y structura. No ta partidonan politico ni gobierno ni Staten ta organisa e proceso democratico di eleccion. Entrega di lista, of postulacion di candidatonan pa eleccion di parlamento no ta un evento di campaña. Ley ta prescribi pa esaki tuma luga na adres di Conseho Supremo Electoral, cu ta aki na Censo.”

Den pasado na otro luga
Riba pregunta di prensa pakico den pasado reciente a organisa e entrega na otro luga y si esaki no ta haci e eleccion ilegal, e Conseho ta contesta cu esey ta ‘no cumplimento cu ley, pero no ta haci e eleccion mes ilegal’.

Tambe e Conseho ta declara cu locual ta ser considera como ‘custumber’, no ta un derecho legal di partidonan. Y esnan cu kier enfatisa e aspecto di campaña pa cu e organisacion di entrega di lista, ta desvia di e punto cu ley ta prescribi.

Conseho Electoral ta termina bisando:” Nos ta sigui pidi gobierno, partidonan politico y publico general pa coopera cu e Conseho aki pa buena marcha di e proceso electoral. Nos kier bisa, e momento pa acepta y coopera a yega. Reto y gana of capricho di partido of individuo pa cambia e organisacion no ta na su luga mas.

Cada partido of persona cu dicidi cu nan mes ta haci kico nan kier, ta trece disturbio den e caracter di siguridad, orden y structura di un estado di derecho. Esaki ta e ora responsabilidad di e partido of individuo ey, no di nos Conseho.”