Considerando situacion di crisis di Covid-19: Departamento di Impuesto lo ta flexibel riba dunamento di boet

Departamento di Impuesto Aruba (SIA) tin comprension cu nan clientenan, mirando e situacion cu Aruba y henter mundo ta pasando aden pa causa di e Covid-19. Pero nan ta recorda cu mañan dia 15 di mei ta e ultimo dia pa entrega e declaracion di luna di april 2020 di entre otro BBO, loonbelasting, toeristenheffing y speelvergunningsrecht y pa nan haci e pago di impuesto corespondiente.

Vocero di SIA, Meverly Romano a afirma na Bon Dia Aruba cu e departamento aki ta bin facilitando e proceso aki pa nan cliente por haci nan declaracion y pago den forma digital. Tambe internamente nan a dicidi cu SIA lo ta hopi flexibel pa loke ta e boetnan cu nan ta pone normalmente pa e persona cu ta cumpli laat.

Pa esun cu ainda no ta familiarisa cu nan sistema digital SIA tin comprension pa nan. E departamento ta purba di yuda nan mas hopi posibel via telefon. Aunke tin personanan cu no ta dispone di un computer, locual ta haci e situacion mas dificil. Nan tin sala digital accesibel pa nan cliente; pero actualmente e no ta factibel pa causa di e restriccion di persona pa motibo di e situacion di Covid-19.

Plataforma digital.
Romano a bisa cu mas bien nan ta aceptando tur e declaracionnan y no exclusivamente esun di fin di luna pa medio di nan portal digital cu ta accesibel via nan website: www.impuesto.aw , caminda tin un formulario digital. E cliente por yen’e y nan ta anexa un scan of potret di nan eindheffing.

Nan ta realistico cu no ta tur persona ta prefera di uza e sistema digital, pero e ta haya cu e ta un cuestion di tempo pa e persona por custumbra cune. “Pasobra esaki ta e manera cu nos ta bay di awor nos dilanti…,” el a declara na e matutino aki. Esaki ta bay bira parti di e adaptacion di e normal nobo caminda tur e declaracion di impuesto lo wordo entrega den forma digital.

El a bisa cu mester haci un distincion cu e impuestonan mensual, caminda tin e parti di entregamento di e declaracion y e parti di e pago. Nan sistema Bo Impuesto ta permiti entregamento di e declaracion. Pero nan mester registra prome via nan website. Pero pa loke ta trata e pago, DIA a pidi nan clientenan pa hacie bao e sistema online di nan banco. Ya cu nan sistema digital online no ta permiti pago.

Bo Impuesto ta nan plataforma oficial cu ta den operacion caba. Mas tanto e comerciantenan ta haci mas uzo di dje pa entrega nan declaracion di tur luna, no mas tarda cu dia 15.

Actualmente alrededor di 4 mil comerciante ta haci uzo caba di e portal digital aki. Pero ainda tin hopi mas cu mester haya acceso, pero nan mester registra prome. Tanten pa esnan cu no tin acceso na nan porta Bo Impuesto, nan tin otro link riba nan website, caminda nan por entrega nan eindheffing den forma digital.