investigacion dep consumidor.jpg

E consumidonan local tin un preferencia pa bin cu un comision di consumido pa atende  y resolve cualkier problema cu ta surgi cu un producto of servicio, como un antesala prome cu bo bay corte pa defende bo derechonan como consumido. Mientras cu di otro banda e negoshinan a mustra un preferencia  pa un “small claims court”.  Esaki ta a base di un encuesta cu departamento encarga cu Asunto di Consumido a realisa recientemente cerca e consumidonan pero tambe cerca e negoshinan.

Sr. Luciano Maduro di departamento di Asunto di Consumidor a declara na Bon Dia Aruba cu tur dos alternativa tin su beneficionan. E ta haya cu loke ta claro di e encuesta aki ta cu mester bin cu algo otro pa resolve un impasse cu por surgi entre e consumido y e negoshi.  E ta haya cu aworaki tin un espacio ya cu “e consumidor su drempel pa yega na su derecho ta mucho halto”.

E departamento aki ta purba yuda e consumidor pero dor cu nan no tin e poder legal y autoridad pa haci tur cos, nan ta basta limita. Pero tampoco nan no tin fondo pa haci un programa di conscientisacion mas completo. E factornan aki ta haci cu tin biaha nan ta sinti cu e ayudo cu nan ta dunando na e consumidor  no ta completo.

Sr. Maduro a declara cu aworaki cu e departamento ta conta cu asistencia di un hurista y cu nan ta atendiendo e kehonan, nan ta sinti cu nan servicio ta hopi miho cu na principio. “Pero nos tin e necesidad  pa haci’e miho ainda”, el a bisa.

Consumidor y negoshi nan derechonan

Sr. Maduro ta agrega cu e consumido tin suficiente derecho y nan kier cu e consumido por disfruta di dje, pasobra di otro banda ta beneficia e mercado tambe, y defacto nos economia. 

E ta bisa cu na principio e departamento aki tabata inclina mas hopi pa e posicion di proteccion di e consumido. Pero na medida cu nan a cuminsa atende cu tanto kehonan, nan a siña cu nan posicion ta semper e punto di bista di e ley. “For di e punto di bista di e ley, nos ta purba di wak kico den realidad ta husto. Y loke ta husto tin biaha ta cay nan fabor di e negoshi y tin biaha ta cay na fabor di e consumido”, segun Maduro.

E ta aclaria cu no ta pasobra e consumido tin un keho e tin rason. Ya cu tin biaha e negoshi a actua den margen di ley, pero tin biaha e consumido  “tin un expectativa irasonabel di loke ta su derecho”. Ora cu e negoshi ta den su derecho nan ta splica e consumidor tambe cu nan no tin e derecho ey, of te eynan e tin derecho.

E departamento aki a haya nan mes cu caso cu e negoshi ta haci un esfuerso maximo y ehemplar pa yuda e consumido. Pero e consumido tin un otro interes, eventualmente nan kier mas di loke e ley por dun’e, y te hasta nan ta nenga e ayudo.

 Den caso asina e departamento aki ta papia cu e consumidor y ta splica bo cu nan ta yuda bo   te hasta unda nan por, y si bo kier mas bo tin cu bay corte. “Nos ta purba di keda imparcial  ya cu nos purba di tin un bon relacion cu tur dos. Y den esey nan ta para banda di e ley”,  segun Sr. Maduro.

 

LEAVE A REPLY

Please enter your comment!
Please enter your name here