DCIM110GOPROG2471349.

Sonido y exceso di sonido den un ambiente marino ta resultado di dinamica den ecosistema, cu por tin causa natural o causa di accion humano. Entre fuente natural por tin teremoto, yobida, ola, y tambe sonido produci pa animal. Di hecho, sonido ta un di e maneranan mas eficiente pa organismo comunica y haya informacion tocante nan ambiente den ecosistemanan marino.

Di otro banda, sonido produci pa accion humano ta relaciona cu motornan di barco comercial y tambe di actividadnan recreacional (buceo, barco crucero). Nan ta inclui tambe e uso di radar pa pisca, mineria den subsuelo di lama, entre otro. Sonido ta bira contaminacion ora e ta genera pa humano y ta interferi di manera negativo cu bida marino. Kico ta e efectonan mas grandi di sonido riba bida marino? Di mes sonido produci pa humano tin efecto riba comportamento di diferente tipo di animal cu ta biba riba coral, pero con ta para cu e cambionan grandi cu a tuma lugar den ultimo lunanan unda actividad riba lama, tanto comercial como recreativo a bira hopi menos, como consecuencia di e crisis causa pa Covid-19?

Desde cu e pandemia a inicia, e actividadnan cu ta causa contaminacion di sonido a bira hopi menos, pasobra e periodo di calma ta dura pa basta tempo caba, cu un cambio drastico den con hende ta usa e planeta aki. Tambe menos actividad humano a trece cune menos contaminacion den lama, den forma di material laga atras y di deposito di awa contamina cu normalmente ta bay oceano. Observatorio Real di Bruselas (Belgica) a mustra un reduccion di 1/3 parti di sonido di humano riba tera debi na e lockdown pa Covid-19. Na varios pais a ripara cu por observa diferente tipo di animal na lugarnan cu nan no tabata bin mas, pa e exceso di presencia humano. Rond mundo hopi hende a cuminza observa y filma presencia di animal cu no tabata bin mas na cierto lugarnan, manera e delfinnan cu ta aparece cerca di e palyanan di Cartagena y Santa marta na Colombia, epicentronan di transporte y turismo cu no tabata haya e tipo di bishita aki mas. Tempo pa nos tambe haci nos analisis?

 

LEAVE A REPLY

Please enter your comment!
Please enter your name here