editorial 2_15_1.jpg
Fin di gobiernonan di un partido?
Loke tabata rumor, nada mas, pa basta tempo, awor ta sucediendo. Negociacion entre diferente posibel partner pa aglomera den un partido nobo, o en todo caso join den un lista combina. Negociacion ta tumando luga ainda, asina ta cu nos lo mester warda te ora cu esunnan envolvi sali y bisa kico nan a logra acorda y kico no.  Loke en todo caso ta parce real, ta cu tin intento pa yega na un partido, of agrupacion di partido, cu ta capaz pa kibra cu e posibilidad di un otro gobierno cu ta goberna su so.
Aruba ta terminando un periodo di diesseis aña di partido gobernando nan so, y tin hopi hende cu no ta encanta cu e resultadonan cu esaki a trece cu ne. E experiencia no tabata asina positivo, pasobra cierto problema cronico di gobernacion a bira pio solamente. Un di nan tabata nos situacion financiero, cu a bay di mal en pio, cu e perspectiva nos dilanti cu hasta un alternativa politico na e momento aki tin e tarea pa den e proximo periodonan di gobernacion bay sanea esaki. Kico esey ta significa concretamente? Cu cualkier cu drenta gobierno na 2017, lo mester bay mara faha y keda sin haci un cantidad di cos, cu tambe ta necesario, pasobra no tin recurso disponibel. Mucho menos anto haci cos ‘nice’ pa cierto hende o grupo, a costo di e demas den e comunidad aki. 
Naturalmente e partido den gobierno no ta mira e asunto asina. Pa nan ta simplemente hunga e carta di e refineria y cla! Pero e cos no ta mustra asina simpel. Berdad ta cu pa nan tur nan bet ta riba e cabay di refineria y si esey no bay bon, e partido tin un problema serio di credibilidad. Kico lo ta bay ta e scenario anto, mirando cu pone e proyecto di rehabilitacion cana, lo mustra hopi mas dificil den realidad cu riba papel. Kico ta e tarea anto, di awor te na eleccion? Percura cu tin cos ta move riba tereno di refineria, en todo caso suficiente pa mayoria di hende kere cu e trabao ta avansando. No ta bay pa loke ta berdad, pero pa loke por haci hende kere. 
Pero kico realmente ta e señalnan di esunnan cu mester pone e proyecto cana? Na prome luga, placa pa inverti den e proyecto. Y di unda e placa mester bin? Di financiamento externo, pasobra den henter e structura di PDVSA y tur su filialnan, no tin recurso disponibel, si no ta pa sobrevivencia. No mucho dia pasa e corant aki mes a trece e noticia cu  pa prome biaha PDVSA no por a cumpli cu su pagonan di interes riba bono, y mester a recuri na e medida di extende e periodo aki pa un luna. Di e mas di 500 miyon dollar cu mester a pone riba mesa, ta solamente 135 miyon e empresa tabatin. Den un situacion asina precario, no por spera cu por uza placa di otro parti temporalmente pa en todo caso cuminsa cu e proyecto na Aruba. E no ta un problema pa nan so, pero pa gobierno di Aruba tambe. E lunanan nos dilanti ta bira crucial pa  por demostra cu e proyecto ta viable y por haya financiamento pa cuminsa.
Esaki ta mas urgente ainda, pasobra e perspectivanan pa economia lanta cabes riba su mes ta hopi  chikito, y berdad ta cu gobierno no a haci practicamente nada pa duna economia un man. Y no ta asina facil pa gaña wowo di hende cu e beneficionan di eventual exploracion di gas, pasobra si acaso haya gas,  esey lo por bay trece algo aden despues di e proximo periodo di gobernacion.
Por bien ta cu den e campaña nos dilanti, tur partido, nobo of bieu, mester contesta e pregunta aki: Kico boso ta pensa di haci pa lanta un economia for di e ‘slump’ cu e ta aden, cu un debe cu ta 86,6% di GDP pa fin di 2016, sin por haci mas debe?
No ta e partido den gobierno so por haya problema di credibilidad. E otro partido grandi no ta duna e imagen di optimismo y vigor cu na e altura aki nan mester tin. Paso falso manera cu e asunto di e amienda no ta yuda pa mehora esaki. Pero esey no necesariamente lo significa cu nan mester ta esun cu ta perde hopi base na fabor di e posibel alternativa. Normalmente esun cu ta den gobierno ta esun cu ta comete eror y ta esun cu ta haya castigo electoral pa esey. E pregunta clave ta keda si tin un base di malcontento cu e partidonan grandi existente, pa haci un otro alternativa atractivo. Den esaki ta necesario corda cu loke ta pintando na caminda no ta algo nobo tampoco, pero lo consisti di politico cu pa un parti a yega di goberna caba, y no tabatin un track record sin mancha. Esaki ta keda conta pa Otmar Oduber, cu a caba di sali di un situacion unda por mir’e como co responsabel, a menos cu e cuminsa distancia di esey. Nos lo tende.