Recientemente, varios ciudadano a acerca redaccion di Bon Dia Aruba pa expresa nan preocupacion y malcontento cu e servicio di Aruparking. Segun nan a expresa, a cuminsa cu accion di control di cumplimento cu Aruparking, sin cu a percura cu por duna servicio adecuado na e ciudadano.

Un di e lectornan, kende ta traha den Caya Grandi, a conta cu for di comienso di introduccion di Aruparking, e ta cumpli tur luna cu paga e suma mensual pa por para auto den e area. Sinembargo, e pago mensual aki ta bin cu un lugar asigna unda cu mag para auto, y segun e ciudadano a conta, e lugar aki ta keda un bon pida leu di su sitio di trabao.

“Tin biaha mi ta bin cu caha di boter di awa pa stock den oficina, y mi tin cu para leu y cana yega te na oficina, maske tin vak habri net dilanti porta,” el a lamenta. Sin laga un banda e incomodidad di e adictonan ambulante cu tin den e area, cu algun di nan ta agresivo, ta intimida hende, y ta crea un ambiente di inseguridad.

Riba website di Aruparking ta indica cu “Aruparking ta bay designa un zona especifico” unda e permiso di parkeo pa e empleado ta valido, y “empleadonan mester para nan auto dentro di e zona ey.” Ademas, “si un empleado para pafo di e zona designa, nan ta rekeri di paga e tarifa standard pa ora pa parkeer.”

E ciudadano ta cuestiona pakico no ta djis cobra e suma mensual, pero permiti e trahadornan para unda cu nan haya un vak disponible.

Pio ainda, ora el purba di bay paga pa para dilanti porta di su trabao – maske esey kiermen paga dobel pa e mesun servicio – a keda confronta cu e inconveniente cu e mashin di Aruparking no ta trahando. “Kiermen hasta si mi kier a cumpli, nan nivel di servicio no ta permiti!”

No tin suficiente suministro pa e demanda

Den e mesun linea, un comerciante den e area tambe a conta Bon Dia Aruba cu e ta hayando problema desde cu a bin cu accion di control di Aruparking. E comerciante aki a tuma e decision di haci e pago mensual pa su trahadornan por para auto y asina bin trabao. Pero ora el a tuma contacto cu Aruparking pa esaki, nan a inform’e cu actualmente no tin vak disponible pa para, y pues e mester bay den un lista di espera.

Bon Dia Aruba den un yamada telefonico cu Aruparking a confirma e hecho cu actualmente lo mester bay un lista di espera prome cu por haya un permiso di parkeo mensual pa para den e area. Dependiendo di ki area precies, e por dura “hopi largo,” a informa.

E comerciante a expresa frustracion pa e hecho cu no ta duna un opcion faborable pa e trahadornan. Un ora di parkeo ta costa dos florin. Pa un trahador cu ta traha 8 ora, sin conta lunch, esey ta nifica un minimo di 16 florin pa dia. Mayoria trahador den e area ta traha 6 dia pa siman, loke lo traduci den un gasto di Afl. 384 pa luna – solamente pa para auto pa por bay traha. Aruparking ta duna tambe e opcion pa un “dia completo” pa Afl. 20, cual ta menos atractivo ainda pa un trahador averahe.

E comerciante tabatin critica fuerte pa e hecho cu ta bin cu un maneho cu cual e propio Aruparking no por cumpli. Ta ofrece e opcion di paga pa parkeo pa luna pa e trahadornan, pero no tin suficiente disponibilidad pa facilita esaki – lagando e trahadornan cu un gasto enorme y inhusto.

Falta di opcion

Loke tur e ciudadanonan cu a acerca Redaccion a expresa en comun, ta e hecho cu no tin otro opcion pa por yega na trabao cu no ta haci uso di auto y Aruparking.

Un di nan, a conta cu e siman aki mes el a para su auto na e unico lugar cu e por a haya disponible, y un trahador di Aruparking a inform’e cu si e laga su auto para eynan, lo yama takelwagen p’e. E no por keda core rond pa oranan largo busca un vak habri, pasobra e mester ta presente na trabao na tempo.

Y no tin opcion di transporte na Aruba cu ta factible.

“Ami lo bay cu bus,” un di e ciudadanonan a expresa. “Pero mi mester ta na trabao pa 6:45am, y no tin niun bus cu ta pasa cerca di mi cas cu mi por tuma pa yega trabao na ora.”

E fenomeno di falta di transporte publico ta uno cu ta bin ta hala mas y mas atencion na Aruba den ultimo temponan, mientras prijs di auto ta carisimo, prijs di gasolin ta aumenta, poder di compra ta baha y hende ta busca alternativa pa por move, traha y haci nan actividadnan diario. E rutanan di Arubus no tin suficiente conectividad pa por sirbi tur persona. Esaki en gran parti ta pa motibo di e manera con Aruba a desaroya, unda compara cu otro paisnan, hende ta esparci mas ampliamente rond di e isla en bes di ta concentra den cierto areanan. Esaki ta crea reto pa un red di transporte publico por funciona pa tur hende na un prijs pagable.

Y mientras por tin comprension pa esaki, e ciudadanonan a cuestiona pakico a opta pa introduci Aruparking. “Ki problema e ta suppose di soluciona?” e comerciante a cuestiona, indicando cu en realidad, e hecho cu mester paga pa para auto ta nifica cu menos hende ta opta di bay Caya Grandi compara cu otro centronan comercial na Aruba unda parkeo ta gratis y tin mas lugar disponible.

Ken ta beneficia?

Den e mesun linea, un di e ciudadanonan a cuestiona si a introduci Aruparking solamente pa “ranca placa for di pueblo.”

“Cuanto empleado Aruparking tin, y kico nan ta haci anto?” el a cuestiona. “Pasobra nan no ta bin yuda mi ora e mashin no ta traha, nan no ta tene e area sigur of make sure cu mi por haya un lugar drechi pa para mi auto. Nan ta djis bin pa pone sticker y yama takel pa bo auto,” el a expresa. “Kiermen nos tin cu paga nan salario cu nos impuesto, y nan unico trabao ta pa haci nos bida dificil.”

Tampoco e personal di Aruparking ta encarga cu seguridad di e autonan den e area, ya cu esey ta tarea di polis. Riba website di Aruparking ta bisa explicitamente cu “Aruparking N.V. ta maneha solamente espacio di parkeo. Para auto ta na bo propio riesgo. Nos no ta responsable pa ningun perdida of daño na vehiculo of pertenencia.”

Y manera menciona, parti di e peliger aki ta bin di e adictonan ambulante. Ademas di paga 2 florin den Aruparking, hopi ciudadano tambe ta sinti intimida y mester paga na e adictonan. Un di e lectornan cu a acerca redaccion di Bon Dia Aruba e siman aki a conta cu berdad el a mira polis ta core cu e adictonan ambulante den e area, pero a cuestiona e maneho aki. “Lo bay bin core cu e ‘choller’ tur dia?”

“Mi ta sinti cu nan a bin cu un maneho sin sa e realidad di bida di e hende cu ta traha ‘kinan,” un di e trahadornan a expresa. “E maneho no ta tene cuenta cu e realidad.”

Mientras tanto, control di Aruparking ta continua, y autoridadnan ta continua advertiendo pueblo: paga, of enfrenta boet y takelmento.