Prome cu Nacionnan Uni a bin cu e 17 metanan di sostenibilidad of SDG (Sustainable Development Goals) pa 2030, ya caba Biblioteca Nacional Aruba (BNA) tabata 4 aña delanta, conscientisando y dunando informacion riba e tereno aki.

Compromiso cu SDGnan.
Na 2011, directora di BNA, Astrid Britten, a dicidi di introduci e proyecto aki, y el a pon’e den man di Ronny Alders, kende ta coordinador di e proyecto di Simposio di Educacion Sostenibel (SES).

Alders ta corda cu ora el a asumi e responsabilidad di coordina e proyecto di educacion sostenibel, e idea aki a bini for di un bibliotecario di New York, Frederick Stoss di University at Buffalo di The State University of New York. “Sin cu nos sa, nos a target un di e metanan di Nacionnan Uni di e SDG.” E tabata un mega-proyecto cu BNA a bin cune, prome cu na 2015 e SDGnan a wordo oficialisa pa henter mundo.

 

Sostenibilidad alimenticio.
Den e simposionan cu nan a yega di organisa, a yega di papia di energia sostenibel, cambio climatico y dos luna pasa e simposio aki a conoce su di 8 version cu e tema di Hofi di Bario.

E proyecto no tin mas su nomber original di Green Education Simposium, pero e ta conserva su mesun esencia y meta. E aña aki nan a pone atencion riba e tema di e hofi den bario of ‘community gardening’. Tur e temanan aki ta relaciona di un of otro forma cu e SDGnan. Por ehempel, e Hofi di Bario ta cuadra cu e di dos meta di e SDGnan, esta ‘Cero Hamber.’

Alders, kende a bin ta trahando cu hopi pasion y entrega den e simposio aki, ta haya cu e topico aki ta uno hopi interesante considerando e tipografia di nos isla. Aruba ta un pais basta seco y awendia cu Aruba tin un sobrepoblacion, unda tur producto ta wordo importa, ta bon pa pensa riba nos sostenibilidad alimenticio.

Den esaki e ta haya cu tur hende y instancianan mester bay riba e mesun linea pa tin nan propio hofi. E ta papia no solamente den cada domicilio, sino den scolnan, departamentonan, iglesianan, etc… Unda bo mester por cultiva diferente sorto di mata, ya sea berdura, fruta y medicinal.

“Esey ta importante pasobra e ta yuda nos tambe den e parti di come mas saludabel,” el a bisa. Pero no solamente come mas saludabel sino mas barata, ya cu nos tur sa con caro cuminda a bira ultimo añanan y e ta sigui bira mas caro.

Den un forma senciyo e ta traduci e beneficio aki como un forma pa yuda bo mes y keda cu mas placa den bo saco. E enfasis ta keda pa bo come mas saludabel, manera nos antepasadonan tabata haci tempo di nan tempo, caminda mayoria di nan tabatin nan cunucunan.

Simposio y futuro generacion.
E simposio aki ta dirigi specificamente pa nos futuro generacion, hobennan di scol secundario y educacion avansa, sin exclui nos adultonan. E ta un forma pa nan compronde cu di parti di BNA tin oradonan y profesionalnan local y internacional riba tereno di sostenibilidad.

Den e simposio aki nan por haya e informacion corecto. Pero tambe pa nan compronde cu tin un futuro na Aruba garantisa pa sostenibilidad. “Aruba ta moviendo hunto cu e paisnan grandi den nos region. Aruba mester bira y nos ta birando, mas sostenibel pa beneficio di nos sociedad,” Alders a expresa.

E simposio aki ta busca entre otro metanan: conscientisa nos studiantenan riba beneficio di energianan sostenibel cu nos por probecha manera solo, awa y biento. Pero tambe probecha y haci uzo di ‘mama tera’ pa planta y produci nos alimentonan.

Tambe –segun Alders– pa nos bira mas consciente riba e bon uzo di e substancia vital y caro cu ta awa na Aruba. Por ehempel, probecha ora cu awa ta cay na Aruba, ya cu e tradicion di antes di wanta awa atras na momento cu awasero cay a bay perdi. Mientras cu e awa aki nos por uz’e pa e hofi den bario y pa agricultura sostenibel.

Conscientisacion.
Alders ta kere cu BNA como centro di informacion y educacion ta dunando un gran aporte na nos comunidad riba asunto di sostenibilidad y realisacion di e SDGnan.

E ta haya cu e simia di conscientisacion a wordo planta caba den nos futuro generacion. E ta mira cu practicamente tur scol ta dedica na sostenibilidad. Ademas tur aña scolnan ta participa cu hopi entusiasmo y dinamismo y ‘eynan e simia ta cuminsa’, cu hopi satisfaccion, Ronny Alders, kende ta coordinador di e proyecto di e Simposio di Educacion Sostenibel (SES), a bisa na Bon Dia Aruba.

LEAVE A REPLY

Please enter your comment!
Please enter your name here