Bon Dia ta disculpa cu su lectornan y Banco Central di Aruba (BCA) pa motibo cu den nos edicion di 12 di maart 2026, Bon Dia Aruba a publica un articulo titula “CBA ta lansa moneda conmemorativo pa marca celebracionnan nacional di Aruba” den cual ta indica cu introduccion di e moneda conmemorativo di plata di 5 florin “Trupial” ta un moneda pa conmemora 40 aña di Status Aparte y 50 aña di Himno y Bandera. E informacion aki no ta corecto.
E informacion corecto ta:
Banco Central di Aruba (BCA) ta informa cu e moneda conmemorativo di plata di 5 Florin “Trupial” ta obtenibel desde 5 di maart 2026 na BCA. E Trupial ta un parha di color oranje-preto hopi yamativo cu ta biba na Aruba, Boneiro y Corsou. E Trupial tin un cabes, lomba y rabo preto, y su halanan tin pluma preto y blanco, pero e resto di su curpa ta oranje briyante. E Trupial ta conoci no solamente pa su color hopi bunita, sino tambe pa su cantamento melodioso. Durante cantamento, e plumanan riba su garganta ta lanta, y su cantamento por wordo scucha henter dia.
E Trupial ta considera un “pirata di neishi”. Na lugar di traha su mesun neishi, e ta busca un neishi bashi of e ta ataca otro parha pa tuma over nan neishi. Specificacion di e moneda: E ta un mondea di Plata (925/1000) cu un diameter di 38 mm, un peso di 25 gram, calidad proof y di un denominacion di 5 Florin cu un prijs di Afl. 230,00.
