Truck KPA (4).JPG

Mayor Alex Pieters di Departamento Unidad di Motor KPA ta splica Bon Dia Aruba cu nan a ripara cu tin varios compania di truck cu ta core e mesun rutanan anto a desaroya un mal custumber cu ta treciendo diferente problema y peliger den trafico.

 

“Ora bo core un ruta hopi, bo ta cuminsa haya un mal custumber. Ya cu bo conoce e caminda anto bo ta bay core cu un tiki mas velocidad. Lubidando cu un dia si algo sosode, bo no ta bay por reacciona pasobra no ta tur dia e situacion ta mesun cos.” Algun siman atras, un truck di santo a bolter na rotonde di Pos Chikito unda cu e chauffeur a resulta herida y mester a solicita ambulance pa presenta y atende cu ne. Den e caso aki, a constata cu den e birada riba e rotonde, e chauffeur di e truck a mira un otro vehiculo laat y a mishi cu ne anto perde control y bolter.

 

Mucho peso
Sr. Pieters ta splica cu e problema cu polis ta riparando ultimo tempo den nan control riba truck ta e situacion di e peso. Pa ley tin un maximo peso pa cada vehiculo por pasa y cada un vehiculo ta traha pa transporta un maximo peso tambe. “Pa ley ta papia di 50 ton, pero si bo tin un vehiculo cu ta traha pa transporta solamente 30 ton, bo no por bay pusha pa transporta 35 of 40 ton. Mi por compronde cu pa cierto trabaonan, nan ta purba di yena nan truck mas posibel pa nan mester core bay bin menos. Pero esaki ta trece peliger.”

Segun e mayor di polis, e tairanan y briknan no ta traha pa tanto peso. Ora maniobra, bo no sa kico por pasa cu e truck. Tambe, e manera cu bo ta pone e carga riba e truck ta haci un diferencia. Como chauffeur tambe bo mester ta presente pa percura cu e peso ta bon poni y tampoco pa no tin movecion den e carga cu ta transportando. “Si tin dos of tres centimeter di movecion, ora bo brik e dos of tres centimeter aki por pone bo vehiculo perde balans of bolter.”

 

Sistema di control
Segun operations manager Andres Ras di EcoTech, nan compania tin un sistema cu e trucknan no mag di core mas cu 75 pa 80 KM pa ora. Nan tin un sistema di GPS cu si e trucknan surpasa esaki, e compania ta haya un notificacion y nan por controla esaki como tambe nan por wak si e truck ta acelera hopi lihe of si e ta brik di golpi. “For di kantoor nos por monitor esaki. Si nos ripara cu esaki ta pasa frecuentemente, nos ta yama e chauffeur pa nos papia cu ne wak kico ta pasando.”

Sr. Ras ta splica cu hopi biaha e materialnan di santo y beton cu nan ta transporta ta pisa. Pero loke ta pasa ta cu e masa ta mas pisa cu e volume mayoria di biaha. Esaki ta crea cu hopi cliente ta yena e baki te na e dak, anto tin biaha e trucknan grandi di EchoTech no por carg’e. “Locual a yega di pasa tambe cu waya of e wowo di hero cu ta trek e baki ta bula. Nos trucknan di sushi por ehempel, nan chauffeurnan cu experiencia tambe ta nota cu manera cu nan sinti cu e ta birando pisa di mas, nos ta deshaci di e sushi na dump. Pa no mester core un ruta cu e truck completamente yen.”

 

Infrastructura di Aruba

Clientenan di EcoTech cu Atco Aruba tin demanda halto anto nan ta cumpli cu esaki pero por ehempel, e chauffeurnan sa tin problema cu taira riba caminda. “Nos chauffeurnan tin asina hopi experiencia cu nan sa unda cu nan core, nan mester tene cuenta y tin biaha e caminda ta smal hasta pa auto regular. Si e caminda ta liber bo ta probecha core un tiki meymey caminda te unda cu bo por. Sinembargo, nos chauffeurnan cu experiencia sa con pa tene cuenta cu esaki,” segun sr. Ras.

 

Segun e Quality Safety Officer pa EcoTech y Atco Aruba, Otmar Britten, dos bes pa luna nan tin un reunion cu e chauffeurnan y papia riba velocidad, pa wak caminda bon y conscientisa riba tur factor importante cu diferente curso y seminario. “Alex Pieters mes tambe ta yuda nos cu esaki. Aña pasa nos a traha riba factornan di siguridad y satisfaccion di cliente. Pasobra nos ta bisa cu si bo haya bo den un accident, e cliente ta sufri tambe. Pues nos ta cubri con pa preveni esey. Hasta bisa e chauffeurnan cu si tin algun waya of mata cu ta abao y ta stroba truck di pasa, pa skirbi esaki y pa nos manda pa DOW, Setar y Elmar pa nan atende cu esey,” sr. Britten ta bisa.

 

“Nos trucknan ta trucknan cu ta core den careda di mey miyon florin pa cada truck,” sr Ras ta sigui splica. Cu entre otro esaki tambe ta pakico nan ta inverti hopi den medidanan di prevencion.

 

Tip pa chauffeur di truck

Locual Alex Pieters a topa hopi biaha riba caminda y seguramente varios otro hende, cu bo ta haya trucknan ta core meymey di caminda y hopi auto mester baha caminda pa e truck pasa. Hopi no ta gusta core man drechi pa motibo cu e truck ta hopi halto y grandi anto tin biaha no tin idea con cerca bo ta banda drechi di caminda cu e taira rechts dilanti. “Den experiencia nos ta wak con tin biaha nan ta kibra nan taira riba stupi y asina cora hasta mas meymey. Un bon tip ta cu bo por haya cierto spielnan cu ta diseña cu ta bay riba e parti dilanti di bo truck anto e spiel ta mustra abao. Pues e spiel por mustra bo exacto con leu bo ta di e banda drechi di e caminda.” Mester tene cuenta cu bo ta coriendo cu un vehiculo grandi cual ta trece responsabilidad grandi y cu bo mester tene cuenta cu otro chauffeurnan tambe riba caminda pa evita un desgracia. Asina e polis ta conclui.