Un corona inusual y horta di siglo 18 a ser debolbi na Ethiopia ayera, despues cu a descubri esaki na Hulanda dos decada atras.
Gobierno Hulandes a facilita e entrega ‘cu e creencia cu tin un deber pa restitui e artefacto importante aki bek na Ethiopia’, segun oficina di prome minister Ethiope, Abiy Ahmed a bisa, compartiendo potret di un Abiy sonriente ricibiendo e corona ceremonial.
“Esaki ta un dia historico pa nos”, segun minister di Cultura y Turismo Ethiope, Hirut Kassaw, a bisa AP.
E corona religioso a desaparece na 1993 y a descubrie na Rotterdam na october. “Ainda mi no sa con e corona aki y otro articulo a ser horta y saca di Ethiopia”, minister di Cultura a bisa, agregando cu a horta varios otro articulo, incluyendo un cruz.
Ethiopia, igual na hopi otro pais Africano, ta expresa deseo di mira artefactonan bolbe cas for di museo y doñonan priva rond mundo. Aña pasa, Museo Nacional Militar na Reino Uni a bisa cu lo debolbe dos lock di cabey di emperador Ethiope venera, Tewodros.
Gobierno Hulandes a bisa den un declaracion ayera cu e corona tabata propiedad di Iglesia Ortodox Ethiope. A bisa cu e corona a desaparece for di e Holy Trinity Church den pueblo di Cheleqot.
Pa varios aña e corona tabata den man di Sirak Asfaw, di nacionalidad Hulandes cu origen Ethiope, segun e declaracion. El a tuma contacto cu ministerio di Exterior aña pasa ‘a traves di mediacion di detective di arte Arthur Brand, pa discuti con pa debolbe e artefacto cultural importante aki’.
“El a bisa nos cu un persona a dun’e pa cuid’e. Pero despues di nota cu ta di origen Ethiope, el a nenga di debolbe esaki bek na e doño y a keda cune pa 21 aña”, e minister di cultura a bisa. E corona ta exhibi na museo nacional di Ethiopia na Addis Ababa, pa algun dia y despues e lo bolbe na su luga original den iglesia na Cheleqot.
Minister di comercio exterior Hulandes, Sigrid Kaag, a atende e ceremonia di entrega. “Nos ta honra y encanta di por facilita e retorno legitimo”, Kaag a bisa.
