(CuraçaoChronicle) – Ayera mainta, Corte na Corsou a aproba e accionnan di e boticarionan. Sinembargo, a duna instruccion na e Asociacion di Boticario y minister interino di Salud, Javier Silvania, pa programa un reunion pa awe pa colectivamente busca un solucion.
Como contesta, e boticarionan a suspende nan accion di protesta, y nan boticanan ta habri di forma usual. Silvania ta bay tin cu atende e demandanan di Asociacion di Boticarionan; de lo contrario, lo por bin cu mas accion.
Diaranson, tur 31 botica riba e isla a cera nan porta te 1pm, a pesar di un instruccion di Inspector di Remedi, Sirving Keli, pa habri back inmediatamente.
Manera Bon Dia Aruba a reporta, diaranson ultimo a traves di un LIVE di medio di comunicacion Direct Media Curaçao a informa tocante un situacion cu tabata tumando luga den oranan di mainta na unda tur botica a bay plat na Corsou. Segun por a compronde, un cantidad grandi empleado tabata protesta pa un problema cu tin varios aña caba tumando luga pa loke ta trata tarifa cu no a ser adapta y cu e suma cu nan ta haya di SVb no ta yega pa nan cubri nan gasto.
Minister Silvania a sali pa ricibi e manifestantenan na Fórti y a bisa cu a manda haci un investigacion y basa riba e resultado, nan lo por yega na e conclusion si mester adapta e tarifa si of no, segun e mandatario a bisa. Algo pa locual el a señala cu lo no ta un garantia, debi cu doñonan di botica como doñonan di trabao ta dicidi esey. “Den e fase ey nos no a yega, pero nos a compronde otro hopi bon y nos a sinta na mesa pa hunto nos yega na un solucion, e siman aki Curaçao su Zorgautoriteit mester contesta mi, nan ta manda un plan pa bisa mi ki termino nan a caba cu e investigacion cu nan mester haci pa wak si e berdad e tarifa cu SVb ta paga no ta yega pa cubri tur gasto,” e mandatario a sigura.
E conflicto ta rond di e asina-yama vergoeding pa tarifa di receta, cu a aumenta di 7 pa 10 florin, y e eliminacion di e co-pago di 1 florin, tarifanan cu no a cambia desde 2001.
