Despues di e candela intencional na edificio di impuesto, no tin claridad pa locual ta trata ubicacion di e trahadonan.
Minister Kenneth Gijsbertha a reuni cu trahadonan di e departamento en cuestion, y locual a palabra ta cu e kier tur trahado na e mesun sitio. E sitio den cual por ubica mayoria di e trahadonan ta un bunker, situa na Mahuma. Esaki ta un bunker secreto, cual no tur hende por yega na e sitio.
Algun trahado a bay tira un bista den e bunker, y a menciona for di e prome impresion cu ta trata di un luga sigur, pero desconecta cu e areanan pafo. Unabes nan ta den e bunker pa traha, nan no tin niun bista di kico ta pasando pafo, na Mahuma mes. Sinembargo, a aclaria cu e parti di pago y cobransa no lo bay den e bunker aki.
Segun e relato, ta studiando e posibilidad pa tur e trahadonan bay traha for di e bunker, cual alabes ta un tipo di proteccion pa nan, pero cu e parti di cobransa mester bay na un otro sitio.
Segun e informacion ricibi, e parti di cobransa lo bay Punda, mas exactamente den e edificio di C Post. Te na e momento, e decision no ta oficial.
