Diaranson ultimo empleadonan local di e Consulado di Republica Bolivariana di Venezuela na Corsou a expresa nan descontento atrabes di un carta habri manda pa e noticiero na spaño Noticias Curazao.
Den e carta, empleadonan a expresa nan disgusto di no a haya un contesta di e Consul General, ni di e canciyer Venezolano tocante e pago di nan salario.
Despues di cinco luna sin ricibi ningun pago, e trahadonan aki ta bisa cu nan ta den un situacion hopi precario, incapaz di cumpli cu nan compromisonan habitual. Algun di nan ta core e riesgo di perde nan hogarnan pa motibo cu nan no por mantene nan hipoteca.
Di e mesun manera e empleadonan a nenga cu e consulado ta funcionando “normalmente”, manera cu a ser anuncia siman pasa pa e consul. “Na e momento di e anuncio aki no tabata tin un computer cu ta traha den e sede y mucho menos e internet of e sistema di administracion” , e carta ta bisa.
E trahadonan ta lamenta di ta suheto na insultonan y acusacionnan inhusto pa no por proporciona di manera optimal e servicionan pa cual nan a ser contrata.
Finalmente e empleadonan a expresa nan pleno boluntad di traha indicando cu, debi na e situacion, nan ta hay’e imposibel pa cumpli cu nan debernan.
E ta importante pa enfatisa cu na principio, e empleadonan local di e consulado, al lo menos na e momentonan di eherce nan funcionnan no ni mester ta obliga pa responde na ningun afiliacion politico.
