(CuracaoChronicle) – Diabierna awo ta bay ta emocionante pa politica Curasoleño pasobra Conseho di Minister di Reino ta bay tuma un decision riba e solicitud di ex-prome minister Eugene Rhuggenaath pa 188 miyon florin den sosten di likides adicional.

E solicitud a wordo haci oficialmente na comienso di e luna aki, esta dia 2 di juni. E 188 miyon cu a solicita ta relaciona na e tercer kwartaal; pa e periodo di juli, augustus y september.

E lunanan aki ta coincidi exactamente cu e prome cien dia di gobierno di prome minister Gilmar Pisas. Si e placa no yega for di Hulanda, e tesoro lo keda bashi, manera indica pa Ministerio di Finanzas.

Corsou no a ricibi sosten di likides pa segundo kwartaal di e aña aki; segun Colegio di Supervision Financiero (Cft), cu ta conseha Conseho di Minister di Reino (Rijksministerraad, RMR) riba e asunto aki, gobierno ainda tabatin suficiente likides pa e lunanan di april te juni. Sin importa cuanto necesidad tin pa sosten financiero adicional den forma di prestamo sin interes – e sosten cu a duna Corsou desde inicio di e crisis di coronavirus ta un total di 668 miyon florin – tur cos ta indica cu e gobierno no ta cumpli cu e condicionnan poni pa Hulanda for di comienso.

Siman pasa, Secretario di Estado pa Asuntonan Interno y Relacionnan di Reino, Raymond Knops a informa Parlamento Hulandes cu ya cu cierto legislacion mester a wordo aproba pa parlamento di Corsou pa basta tempo caba, RMR a dicidi riba dia 26 di mei cu ‘Corsou lo ta eligibel pa sosten di likides atrobe solamente si adopta e legislacion y esaki drenta na vigor’.

Ta trata aki di e reduccion di 12.5 porciento riba condicionnan laboral di ambtenaarnan, cu ta conoci pa alrededor di un aña; y e 12.5 porciento di reduccion riba beneficionan di entidadnan afilia na gobierno.

Con financieramente dependiente Corsou a resulta di ta den crisis di covid tambe ta aparente for di e hecho cu di e 682 miyon cu, segun Ministerio di Finanzas a wordo gasta den e periodo di 20 di maart te 21 di mei en conexion cu e pandemia di coronavirus, un total di 667.5 miyon a bin di Hulanda y apenas 14.7 miyon di su ‘propio presupuesto’.

Y di e suma total aki, 427.8 miyon tabata asina-yama sosten di presupuesto: pa tene e presupuesto nacional aflote y permiti e aparato gubernamental pa funciona. Den otro palabra, 65 porciento (casi dos tercer parti) di cada florin for di Hulanda a bay pa gobierno, y un tercer parti a bay pa paga companianan (NOW y TVL), esnan emplea riba nan mes, esnan cu a perde trabao, y ayudo social den forma di carchi di pago.

Tur wowo ta riba RMR diabierna awo na Den Haag, unda lo tuma un decision riba e 188 miyon florin cu a solicita pa tercer kwartaal. Maske e reporte anteriormente e siman aki cu Hulanda ta stop sosten di likides pa Corsou a keda rechasa inmediatamente pa un vocero for di Den Haag, a declara cu Corsou toch no ta cumpli cu e condicionnan.

Ademas, gobierno Hulandes a traves di Secretario di Estado Knops ya a informa e prome minister nobo, Pisas, y su partner di coalicion, Larmonie-Cecilia den preto cu blanco cu ‘participacion den rijkswet COHO ta un condicion pa obtene sosten di Hulanda’.