Un paso significativo den direccion di cooperacion maritimo duradero
Pa fortalece e laso economico y social entre Aruba y Corsou, Minister Roderick Middelhof (Minister di Desaroyo Economico, Corsou) y Minister Geoffrey Wever (Minister di Finanzas, Asunto Economico y Sector Primario, Aruba) a duna formalmente e inicio pa e desaroyo di un conexion di ferry entre e dos isla.
E iniciativa aki ta representa un paso esencial pa integracion regional, mobilidad y un cooperacion maritimo mas amplio, segun un comunicado di gobierno.
Conseho di Minister di e dos pais a aproba e Plan di Accion. Cu esaki, Hulanda tambe a aproba e peticion pa financiamento via e Landspakket, loke ta pone disponibel un suma di subsidio pa e prome fase di e trayecto.
E proyecto ta inclui un estudio di factibilidad conhunto, cu tin den su alcance preparacion y ehecucion di un destaho publico. Meta final ta pa atrae un operador di ferry competente cu por ofrece un conexion confiabel y futuro-resistente entre Aruba y Corsou.
Den e siguiente periodo, lo tuma luga un serie di analisis tecnico, economico y ecologico, tambe un dialogo structural cu stakeholdernan. Si e resultado ta positivo, lo sigui cu e proceso di destaho publico, cu meta final pa otorgacion na un operador den 2026.
“E proyecto aki ta refleha nos ambicion pa fortalece y amplia nos cooperacion economico y turistico den region. Un conexion cu ferry entre nos islanan no ta solamente un medio di transporte, pero un brug pa crecemento duradero y un laso regional mas fuerte,” segun Minister Roderick Middelhof di Corsou.
Minister Geoffrey Wever di Aruba a expresa: “Mi ta particularmente satisfecho cu e proyecto aki cu nos ta desaroya hunto cu Corsou y Hulanda. Un bon conexion entre Aruba y Corsou, pa persona y pa carga, lo trece beneficio directo pa nos economia y pa nos ciudadano. Cooperacion regional ta bira cada biaha mas importante, specialmente mirando e desaroyonan geopolitico den nos region.”
