Corte den Prome Instancia di Aruba a condena un homber di 29 aña na seis aña di prison y a impone tambe e medida di terbeschikkingstelling (TBS) cu condicionnan, despues cu el a ser declara culpabel di intento di homicidio boluntario.

Segun e sentencia, emiti dia 12 di juni y publica dia 1 di juli, e condenado a hinca un otro homber ocho biaha cu un cuchiu durante un incidente cu a tuma lugar dia 12 di augustus 2025, causando heridanan serio, incluyendo un collapse di un pulmon. Corte a conclui cu, aunke no por a ser comproba cu e atake a ser planea cu anticipacion, e accionnan di e acusado a crea un riesgo real cu e victima por a perde su bida.

Ministerio Publico (OM) a pidi condena pa intento di asesinato, argumentando cu e condenado a actua cu premeditacion. Defensa, di otro banda, no a presenta argumento contra e evidencia principal, pero a concentra riba un apelacion na “noodweerexces” (uso di defensa propio excesivo).

Segun e acusacion, e condenado a ataca e victima cu un cuchiu y a hink’e den diferente parti di su curpa, incluyendo e pecho, cabes, schouder y brasa. E heridanan a causa collapse di un pulmon y otro heridanan cu, segun Corte, tabata potencialmente fatal.

Durante su evaluacion, Corte a analisa evidencia medico, declaracion y mensahenan di WhatsApp cu a ser recupera for di e telefon celular di e acusado. Den un di e mensahenan, manda e mesun dia, tabata lesa: “E no ta scapa e ta muri.” OM a considera cu e mensahe ey tabata demostra pre-meditacion. Sinembargo, Corte a yega na otro conclusion.

Segun Corte, e dossier no ta permiti determina cu siguransa na ki momento exacto e incidente a tuma lugar. Varios melding den e investigacion ta menciona oranan diferente, loke a haci imposible pa confirma si e mensahe a ser manda prome cu e atake of despues. Ademas, e contenido di e mensahe no tabata suficientemente concreto pa comproba cu e condenado a prepara e hecho di antemano. Pa e motibo ey, Corte absolve e acusado di intento di asesinato.

A pesar di esey, Corte a conclui cu e evidencia tabata suficiente pa declara cu e condenado culpabel di intento di homicidio boluntario. Segun hues, e acusado conscientemente a acepta e posibilidad cu su accionnan por resulta den morto di e victima.

Corte a subraya cu e condenado a hinca e victima ocho biaha den parti vulnerabel di su curpa, incluyendo e pecho y cabes, unda organonan vital ta localisa. E rapport medico tambe a confirma cu e victima a sufri un collapse di pulmon un herida cu por pone bida den peligro si no ser trata rapidamente. Pa Corte, e forma con e atake a ser ehecuta no a laga duda cu e condenado a acepta e riesgo mortal di su accionnan.

Den e sentencia, e hues a enfatisa cu e tipo di violencia aki tin consecuencia serio tanto pa e victima como pa personanan cu a presencia e incidente. Segun Corte, violencia cu cuchiu di e naturalesa aki ta representa un infraccion grave riba integridad corporal di un persona y ta causa inseguridad den sociedad.

Otro circunstancia cu a hunga rol den e decision tabata e antecedentenan penal di e acusado. Segun e sentencia, e tabatin apenas dos siman liber bao condicion despues di un condena anterior di dies aña pa homicidio boluntario. Segun Corte, esaki ta mustra cu e condena anterior no a evita cu el comete un otro delito di violencia serio.

Despues di declara e condenado culpabel di intento di homicidio boluntario, Corte a pasa pa evalua e apelacion di defensa, e condicion mental di e acusado y e tipo di sancion cu tabata necesario pa proteha sociedad y reduci e riesgo di ripiticion di delito.

Durante e proceso, defensa a argumenta cu e condenado mester a ser libera di responsabilidad penal pasobra el a actua den un situacion di “noodweerexces”. Segun defensa, e acusado a sinti cu su bida tabata na peliger y a reacciona den un estado emocional fuerte. Nan a reconoce cu su reaccion tabata desproporcional, pero a sostene cu esey tabata consecuencia di e menasa cu e tabata percibi.

Corte a rechasa e argumento ey. Basa riba evidencia y imagennan di camara di seguridad, hues a conclui cu e condenado mes a busca e confrontacion. Segun e sentencia, e videonan ta mustra cu el a cana agresivamente den direccion di e victima, cu e victima a hala atras y cu despues e condenado a atak’e cu un cuchiu. Pa e motibo ey, e hues a considera cu su conducta tabata ofensivo y no defensivo, loke a haci cu e apelacion riba “noodweerexces” a ser rechasa.

Na momento di determina e castigo, Corte a considera tanto e gravedad di e delito como e circunstancianan personal di e acusado. Segun Corte, e atake cu cuchiu a pone e bida di e victima den peliger real y a causa heridanan cu por a resulta fatal. Ademas, e hecho cu e incidente a tuma lugar apenas dos siman despues di su liberacion condicional despues di un condena anterior pa homicidio boluntario a pisa fuertemente den e decision di hues.

Den e proceso tambe a ser presenta rapportnan psicologico, psikiatrico y di Reclassering. E expertonan a conclui cu e condenado ta sufri di un trastorno di personalidad cu caracteristicanan antisocial y paranoïco, abuso di cannabis y un nivel di inteligencia bao di e promedio. Segun nan, e problema di comportamento, agresividad y impulsividad tabata presente for di un edad hoben y tambe na momento cu e delito a ser cometi.

Tanto e psicologo como e psikiatra a conclui cu e hecho por ser atribui na e condenado den grado reduci, pero cu e riesgo cu e lo ripiti un delito ta halto. Pa e motibo ey, nan a recomenda tratamento intensivo enfoca riba control di agresion, impulsividad, adiccion, trauma y reintegracion social. E tratamento lo ser realisa pa medio di Stichting Hunto y Respaldo, cu supervision di Reclassering.

Reclassering tambe a conseha impone TBS cu condicionnan. E condicionnan ta inclui cooperacion cu supervision, participacion den tratamento, control regular di uso di droga, training pa controla agresion, training di habilidadnan social, trabao pa reintegra den mercado laboral y prohibicion di contacto cu e victima y su ex-pareha.

Corte a conclui cu seguridad di sociedad ta exigi no solamente un condena di prison, sino tambe un tratamento obligatorio pa reduci e riesgo cu e condenado lo comete un delito similar den futuro. Segun Corte, si e condicionnan di TBS no ser cumpli, e medida por eventualmente ser converti den un tratamento obligatorio mas severo.

Por ultimo, Corte a condena e acusado na seis aña di prison, kitando e tempo cu el a pasa den detencion preventivo, y a impone e medida di TBS cu condicionnan. Corte a ordena pa Reclassering supervisa e cumplimento di e tratamento y otro obligacionnan. Ademas, hues a determina cu dos telefon celular y un saco cu tabata contene obhetonan cu tabata parce bolita di droga mester ser debolbi na e acusado, pasobra e obhetonan no tabata contene substancianan prohibi ni tabata suheto na confiscacion.

Cu e sentencia aki, Corte a conclui cu un combinacion di prison y tratamento intensivo ta e forma mas apropia pa castiga e delito, proteha sociedad y na mesun momento ofrece e condenado un oportunidad pa aborda e problema mental y di comportamento identifica door di expertonan. Segun Corte, e medida ta busca limita e riesgo cu e condenado lo comete un delito similar den futuro mientras cu e ta haya e tratamento cu, segun e rapportnan profesional, ta necesario pa un eventual reintegracion responsable den sociedad.